Të kamur nga Perëndimi paguanin të vrisnin njerëz “për sport”! Dorëzohen pamjet, Vuçiç në një nga postet e “turizmit” makabër!

Një gazetar investigativ kroat ka paraqitur një padi te prokurorët e Milanos kundër presidentit serb, Aleksandar Vuçiç, i dyshuar për përfshirje në grup snajperësh në Sarajevë gjatë Luftës së Bosnjës, në të cilat të huaj të pasur dyshohet se paguan shuma të mëdha parash për të qëlluar “për sport” civilët boshnjakë në vitet 1990.

Javën e kaluar, prokurorët e Milanos nisën një hetim që synonte identifikimin e disa italianëve të akuzuar për vrasje me dashje të rënduar nga mizori dhe motive të shëmtuara. Sipas hetuesve, grupe “turistësh snajperë” dyshohet se kanë marrë pjesë në vrasje masive pasi u kanë paguar shuma të mëdha parash ushtarëve që i përkisnin grupeve të Radovan Karaxhiçit ish-liderit serb të Bosnjës i cili në vitin 2016 u shpall fajtor për gjenocid dhe krime kundër njerëzimit.

The Guardian shkruan se më shumë se 10,000 njerëz u vranë në Sarajevë nga bombardimet dhe snajperat midis viteve 1992 dhe 1996 në atë që ishte rrethimi më i gjatë në historinë moderne, pasi Bosnja dhe Hercegovina shpalli pavarësinë nga Jugosllavia.

Snajperët ishin ndoshta elementi më i frikshëm i jetës nën rrethim në Sarajevë, sepse ata qëllonin pa dallim njerëzit në rrugë, përfshirë fëmijët.

Hetimi filloi nga një ankesë ligjore e paraqitur nga Ezio Gavazzeni, një shkrimtar i cili mblodhi prova mbi akuzat, si dhe një raport të dërguar prokurorëve nga ish-kryetarja e bashkisë së Sarajevës Benjamina Karić.

Gavazzeni tha se kishte lexuar për herë të parë raportet rreth turistëve të dyshuar si snajperë në shtypin italian në vitet 1990, por vetëm pasi pa Sarajevo Safari, një dokumentar i vitit 2022 nga regjisori slloven Miran Zupanič, filloi të hetonte më tej.

Të mërkurën, gazetari investigativ Domagoj Margetić paraqiti padinë e tij kundër Vuçiçit te prokurorët që po hetojnë çështjen. Siç është raportuar në Sarajevë, ditët e fundit Margetić postoi prova në mediat sociale se edhe vetë Vučić, atëherë një vullnetar i ri, ishte i pranishëm në një nga postet ushtarake në Sarajevë nga ku, – sipas dëshmitarëve, – shtetas të huaj dhe njësi ultranacionaliste serbe qëllonin dhe vrisnin civilë në atë që është përshkruar si një “safari turistik” makabër.

Nicola Brigida, një avokat që ndihmoi Gavazzeni-n të përgatiste çështjen e tij, tha: “Provat e grumbulluara pas një hetimi të gjatë [nga Gavazzeni] janë të mbështetura në fakte dhe mund të çojnë në hetime serioze për të identifikuar fajtorët. Ekziston edhe raporti nga ish-kryetari i bashkisë së Sarajevës.”

Gavazzeni pretendoi se shumë italianë dyshohet se kanë qenë të përfshirë, pa dhënë një shifër të saktë. Ai deklaron se kishte gjermanë, francezë, anglezë… njerëz nga të gjitha vendet perëndimore që paguan shuma të mëdha parash për tu çuar atje për të qëlluar civilët

Ai shtoi: “Nuk kishte motive politike apo fetare. Ata ishin njerëz të pasur që shkonin atje për argëtim dhe kënaqësi personale. Po flasim për njerëz që i duan armët dhe që ndoshta shkojnë në poligone qitjeje ose në safari në Afrikë.”

Gavazzeni pretendoi se të dyshuarit italianë do të takoheshin në qytetin verior të Triestes dhe do të udhëtonin për në Beograd, nga ku ushtarët serbo-boshnjakë do t’i shoqëronin ata deri në kodrat e Sarajevës.

“Kishte një trafik turistësh lufte që shkonin atje për të qëlluar njerëz. Unë e quaj indiferencë ndaj së keqes“, tha ai.

Vuçiç ende nuk ka komentuar mbi akuzat. Megjithatë, thashethemet rreth kohës së tij në Sarajevë kanë qarkulluar prej vitesh.

Në një intervistë të vitit 2021 me një kanal televiziv boshnjak, presidenti serb mohoi të ketë qëlluar ndonjëherë njeri në qytetin e rrethuar, duke i përshkruar akuzat si një manipulim politik.

Klikoni për të parë VIDEON