Gazetari tregon se çfarë nuk u pa nga mbledhja e KLP-së për zgjedhjen e kreut të ri të SPAK: Një nga ambasadorët gati sa nuk nxori bërrylin

Gazetari Eni Ferhati ka zbuluar një detaj interesant nga mbledhja ditën e sotme në KLP për zgjedhjen e kreut të ri të SPAK, ku u përzgjodh se Klodian Braho do të jetë pasuesi i Altin Dumanit në krye të Prokurorisë së Posaçme.

Ferhati tha se në momentin e zgjedhjes së Brahos, një nga ambasadorët aty, gati sa nuk nxori bërrylin, duke i dhënë shenjë një ambasadori tjetër se punë e kryer.

“Ajo që më ra në sy ishte momenti kulminant i votimit. Isha aty kur u votua dhe, për rastësi, votat e para u ndanë mes dy kandidatëve dhe ishin: Braho – Xholi, 3 me 3 dhe dukej sikur po shkonim drejt një balotazhi, por menjëherë pas numërimit të votës së gjashtë, votat e tjera ishin për zotin Braho: 4 me 3, 5 me 3, 6 me 3 – gjithmonë për Brahon.

Në këtë moment, kur u votua, është aritmetikë e thjeshtë: një nga ambasadorët aty, gati sa nuk nxori bërrylin, duke i dhënë shenjë një ambasadori tjetër se punë e kryer, misioni u krye. Nuk e kam lexuar, isha dëshmitar okular aty dhe e pashë vetë këtë episod jashtë syrit të kamerave,” tha gazetari Ferhati.