Lufta në Ukrainë/ Putin i hapur për shkëmbim territoresh me Zelenskyn… po dëshiron për vete gjithë Donbasin
Presidenti Vladimir Putin u tha disa prej biznesmenëve më të lartë të Rusisë se mund të jetë i hapur për shkëmbimin e disa territoreve të kontrolluara nga forcat ruse në Ukrainë, por se dëshiron të gjithë Donbasin, raportoi gazeta Kommersant.
“Vladimir Putin pohoi se pala ruse është ende e gatshme të bëjë lëshimet që ai bëri në Anchorage. Me fjalë të tjera, se ‘Donbasi është i yni’”, raportoi Kommersant.
Në thelb, Putini dëshiron të gjithë Donbasin, por jashtë asaj zone “nuk përjashtohet një shkëmbim i pjesshëm territoresh nga pala ruse“.
Presidenti ukrainas Volodymyr Zelensky, në një deklaratë për gazetarët të lëshuar nga zyra e tij, tha se delegacionet ukrainase dhe amerikane i ishin afruar gjithnjë e më shumë finalizimit të një plani prej 20 pikash në bisedimet e fundjavës në Miami.
Por Zelenskiy tha se Ukraina dhe Shtetet e Bashkuara nuk kishin gjetur gjuhë të përbashkët për kërkesat që Ukraina të lëshojë pjesët e Donbasit që ajo ende kontrollon, ose për të ardhmen e centralit bërthamor Zaporizhzhia i cili kontrollohet nga forcat ruse.
Presidenti i SHBA-së, Donald Trump, ka premtuar vazhdimisht se do t’i japë fund konfliktit më vdekjeprurës në Evropë që nga Lufta e Dytë Botërore, dhe i dërguari i tij, Steve Ëitkoff, dhe dhëndri i tij, Jared Kushner, kanë negociuar me Rusinë, Ukrainën dhe fuqitë evropiane.
Detajet e plota të propozimeve të SHBA-së nuk janë zbuluar, megjithëse zyrtarët rusë janë referuar vazhdimisht “mirëkuptimeve” të paspecifikuara të arritura midis Putinit dhe Trumpit në një samit në Anchorage të Alaskës, në gusht.
RUSIA KËRKON DONBASIN
Sipas vlerësimeve ruse, Rusia kontrollon të gjithë Krimenë, të cilën e aneksoi në vitin 2014, rreth 90% të Donbasit, 75% të rajoneve të Zaporizhzhisë dhe Khersonit, si dhe pjesë të rajoneve të Kharkivit, Sumit, Mykolaivit dhe Dnipropetrovskit.
Putin tha më 19 dhjetor se mendonte që një marrëveshje paqeje duhet të bazohet në parimet e kushteve që ai përcaktoi në vitin 2024: Ukraina tërhiqet nga të gjitha rajonet Donbas, Zaporizhzhia dhe Kherson, dhe Kievi zyrtarisht heq dorë nga qëllimi i tij për t’u bashkuar me NATO-n.
Sipas Kommersant, Putin ngriti gjithashtu çështjen e centralit bërthamor Zaporizhzhia, objektit më të madh bërthamor në Evropë, në takimin e tij me biznesmenët. Putin, sipas Kommersant, tha se po diskutohej menaxhimi i përbashkët ruso-amerikan i centralit bërthamor.
Putin tha gjithashtu se Shtetet e Bashkuara kishin shprehur interes për minierat e kriptomonedhave pranë uzinës dhe se uzina duhet të përdoret për të furnizuar pjesërisht Ukrainën, tha Kommersant. Rusia pushtoi Ukrainën në shkurt të vitit 2022 në atë që Kremlini e quan një “operacion ushtarak special”.