Nga Italia në burgjet e Brukselit, ja kush janë dy të arrestuarit e tjerë bashkë me Mogherinin, njëri kryediplomat dhe tjetri drejtori i Komisionit Evropianhttps://cdnimpuls.com/newsbomb.al/media3/-900-0-1764700508xscreenshot-3-572.jpg

Arrestimi i ish-shefes së politikës së jashtme të BE-së, Federica Mogherini dhe dy zyrtarëve të tjerë të BE-së, pas bastisjeve nga policia belge në një hetim për mashtrim, ka tronditur institucionet evropiane.

Sipas Zyrës së Prokurorit Publik Evropian, ekzistojnë “dyshime të forta” se individët e arrestuar janë të përfshirë në një rast shkeljeje të rregullave të konkurrencës në dhënien e një kontrate për të drejtuar një akademi trajnimi diplomatik.

Përveç Federica Mogherinit, në paraburgim janë edhe ish-diplomati italian i BE-së, Stefano Sannino dhe bashkëdrejtori i zyrës ekzekutive të arsimit të Kolegjit të Evropës, Cesare Zegretti.

Bastisjet, të cilat u kërkuan nga Zyra e Prokurorit Publik Evropian (EPPO), u kryen nga policia belge në zyrat e Shërbimit të Veprimit të Jashtëm të BE-së (EEAS) në Bruksel, në ndërtesat e Kolegjit të Evropës në Bruges dhe në shtëpi private.

EEAS është departamenti i politikës së jashtme të BE-së. Deri në vitin 2019, ai drejtohej nga ish nënkryetarja e Komisionit, Federica Mogherini. Në vitin 2020, ajo u bë rektore e Kolegjit të Evropës, një institucion trajnimi për zyrtarët e ardhshëm të BE-së.

Stefano Sannino, një ish-diplomat italian, ishte një nëpunës i lartë civil në EEAS. Ai tani është drejtor i përgjithshëm i Komisionit Evropian për Lindjen e Mesme, Afrikën e Veriut dhe rajonin e Gjirit.

Personi i tretë i ndaluar në hetim është Cesare Zegretti, bashkëdrejtor i zyrës së trajnimit dhe projekteve ekzekutive të Kolegjit të Evropës, raportoi Politico, duke cituar një person të njohur me çështjen.

Hetuesi ka 48 orë kohë për të vendosur për veprime të mëtejshme, sipas një zyrtari tjetër të njohur me hetimin, sepse deri më tani nuk janë ngritur akuza kundër të arrestuarve, ndërsa vet Komisioni nuk pranoi të komentojë.