Pamjet e fundit tregojnë çiftin që përpiqet të ndalojë një nga autorët e sulmit në Bondi Beach, por u vranë të parët

Një çift i vrarë në të shtënat në Bondi Beach u përpoqën të ndalonin njërin nga sulmuesit e dyshuar duke i rrëmbyer armën, tregojnë pamjet dramatike të kamerave të makinës.

Boris Gurman, 69 vjeç, dhe gruaja e tij Sofia, 61 vjeç, ndërhynë me guxim për të mbrojtur të tjerët përpara se të qëlloheshin vetë, tha familja e tyre në një deklaratë.

Videoja e incidentit tregon Gurman, i cili ishte në pension, duke u përleshur me njërin nga personat e armatosur dhe duke ia marrë armën, përpara se të dy të binin në rrugë. Ai ngrihet dhe duket se e godet sulmuesin me armë.

Më pas mendohet se sulmuesi ka marrë një armë tjetër të cilën e përdori për t’i vrarë. Çifti Gurman, të cilët ishin hebrenj, ishin dy personat e parë të vrarë në sulmin e së dielës, raportoi Sydney Morning Herald.

“Ndërsa asgjë nuk mund ta zvogëlojë dhimbjen e humbjes së Borisit dhe Sofias, ne ndiejmë një ndjenjë të madhe krenarie për trimërinë dhe vetëmohimin e tyre”, tha familja. Në deklaratën e tyre, familja tha se çifti ishte i martuar për 34 vjet.

Të paktën 15 persona janë konfirmuar të vdekur në të shtënat, të cilat ndodhën gjatë një eventi për të shënuar ditën e parë të Hanukkah.

Gruaja që zotëron pamjet e kameras së makinës i tha Reuters se zoti Gurman “nuk ia mbathi – përkundrazi, ai u turr drejt rrezikut, duke përdorur të gjithë forcën e tij duke u përpjekur t’i rrëmbente armën dhe duke luftuar deri në vdekje”.