“Përshatu ose vdis!” SHBA premton 2 miliardë dollarë ndihmë humanitare, por i vendos kushte OKB-së, ja për cilat vende nuk do të jepet asnjë qindarkë
Shtetet e Bashkuara kanë premtuar 2 miliardë dollarë për të financuar programet humanitare të Kombeve të Bashkuara (OKB), por me një kusht: e kanë paralajmëruar OKB-në se duhet të “përshtatet ose të vdesë”.
Njoftimi u bë në Gjenevë nga Jeremy Lewin, Nënsekretari i Presidentit Trump për Ndihmë të Jashtme, dhe shefi i ndihmës emergjente të OKB-së, Tom Fletcher. Kjo vjen në mes të shkurtimeve të mëdha në fondet e SHBA-së për operacionet humanitare dhe shkurtimeve të mëtejshme që priten nga donatorë të tjerë, si Mbretëria e Bashkuar dhe Gjermania.
Ky financim vjen me kushte të bashkëngjitura. Edhe pse donatorët e OKB-së ndonjëherë caktojnë projekte specifike, financimi i OKB-së i jep përparësi vetëm 17 vendeve, midis tyre Haiti, Siria dhe Sudani.
Afganistani dhe Jemeni, tha zoti Lewin, nuk do të marrin asnjë para, duke shtuar se Uashingtoni kishte prova se në Afganistan fondet e OKB-së po devijoheshin te talebanët dhe se” “Presidenti Trump nuk do të tolerojë kurrë asnjë qindarkë nga paratë e taksapaguesve që të shkojë te grupet terroriste”.
Kushtet e vendosura për financimin e ri amerikan përjashtojnë gjithashtu shpenzimin e parave për projekte që lidhen me trajtimin e ndryshimeve klimatike, të cilat zoti Lewin tha se nuk ishin “shpëtuese jetësh” dhe jo në “interesin e SHBA-së”.
Z. Lewin, një besnik i Trumpit, i cili thuhet se ishte ideatori i mbylljes së USAID-it dhe shkarkimit të mijëra stafit të tij, e paralajmëroi OKB-në se ajo duhet të “përshtatet ose të vdesë”, duke thënë se “banka e kursimeve” e SHBA-së nuk është e hapur për ato organizata që duan vetëm të kthehen në sistemin e vjetër”.
SHBA-të thonë se financimi duhet të jetë i fokusuar dhe efikas, pa dyfishime midis projekteve të ndihmës. Këto janë cilësi që Tom Fletcher dhe i gjithë sistemi i OKB-së thonë se i mbështesin me gjithë zemër. Por, ndërsa OKB-ja po e mirëpret me mirënjohje financimin e ri të SHBA-së, mbeten pyetje të mëdha nëse kushtet përreth tij janë shumë të politizuara, raporton BBC.