Shqipëria në delir, mposht Bjellorusinë dhe e nis me këmbë të mbarë Ligën e Kombeve

Një fitore e pastër 2-0 dhe kuqezinjtë janë në delir. Ndeshja përballë Bjellorusëve në Minsk për Ligën e Kombeve ishte me fat per kuqezinjtë, pasi i mposhtën me rezultatin 2-0.

Dy gola në të dyja pjesët dhe kaq ka mjaftuar që ekipi që drejtohet nga italiani Reja të jetë më e motivuar në sfidën e radhës ndaj Lituanisë, në Air Albania më 7 shtator.

Goli i mbarë u shënua në minutën e 23-të nga bomberi Sokol Cikalleshi. Shqipëria u shfaq mirë edhe fizikisht dhe në aspektin taktik. Pjesa e parë u mbyll 1-0. Në të dytën, bjellorusët shfaqen më të rrezikshëm, por nuk arrijnë të finalizojnë. Rënia fizike u vu re të kuqezinjtë dhe kjo ndikoi.

Më pas ndryshimet e trajnerit Reja me largimin e Cikalleshit dhe të Trashit, duke futur Odise Roshin dhe Bekim Balën e bën Shqipërinë më të rrezikshme. Goli i dytë erdhi në minutën 78-të, nga këmbët e Keidi Bares.

Bjellorusia shihej si kundërshtari më i fortë në grup, ndërsa pas tre ditësh, kuqezinjtë do të përballen me Lituaninë. Një fitore në Tiranë rrit shpresat për të dalë të parët në grup.