Përplasja për dekoratat, LSI në mbrojtje të Metës: Distancohuni nga deklaratat për heronjtë e atdheut, akt provokativ
Lëvizja Socialiste për Integrim i bëri thirrje Partisë Socialiste të distancohet dhe të dënoje deklaratat e Ministres Spiropali për dëshmorët.
Në një deklaratë për mediat, zëvendëskryetari i LSI-së, Luan Rama, tha se ky është një akt provokativ që synon vrasjen e identitetit kombëtar.
“Nuk do ta ulja veten të merresha me të dhe nuk do t’ju imponohesha në këto kohë juve duke ju referuar një personi që të gjithë e neverisni. Akti nuk është vetëm provokativ por qëndrim i qëllimtë i një strategjie që synon vrasjen e identitetit tonë kombëtar dhe synon të lërë atdheun pa dëshmorë dhe heronj. Është e ligë përpjekja për të futur në luftën e politikës së ditës ata që dhanë jetën për atdheun. PS sa më parë duhet të distancohet dhe të dënojë të tilla deklarata dhe qëndrime që nuk i bëjnë nder jo PS por askush që i mendon dhe artikulon”, deklaroi nënkryetari i LSI-së, Luan Rama.
Sipas Ramës, deklarata të tilla nuk i bëjnë mirë askujt dhe tregojnë ligësinë e atyre që i bëjnë ato. “Prandaj ajo që duhet të bëjë sa më parë PS, nëse ka mbetur në radhët e saj ndonjë socialist, është distancimi dhe dënimi i të tilla deklaratave e qëndrimeve që nuk i bëjnë nder PS dhe askujt që i mendon dhe i artikulon”, deklaroi ndër të tjera Rama.
Deklaratën ai e mbylli me shprehjen popullore: “Nuk pëgërët deti nëse fut turinjtë një mi!”
Ministrja, Elisa Spiropali, tha në një studio televizive se Presidenti dhe varrmihësit e tij po merren me të rënët e para 100 viteve për qëllime elektorale, duke ju referuar dekoratave të dhëna nga Meta.
Deklarata e plotë
Më lejoni t’ju kërkoj ndjesë që jam i detyruar t’ju marrë kohë në këtë moment, aq më tepër në morinë e shumë problemeve, shqetësimeve dhe halleve që ju keni e që jeni të detyruar të përballoni.
Por, në respekt të ndjeshmërisë tonë kombëtare ndaj dëshmorëve të atdheut, në nderim të të gjithë atyreve që e lidhën jetën me Shqipërinë dhe ju falën asaj, jam i detyruar të sjell në vëmendjen tuaj sërish një qëndrim provokues, fyes, poshtërues dhe denigruese të mbajtur në emisionin “Opinion” nga një anëtar i qeverisë së Republikës së Shqipërisë.
Në papërgjegjshmëri të plotë, zëdhënësja e qeverisë, i cilësoi të rënët për lirinë dhe pavarësinë e atdheut si “ushtri e të vdekurve” dhe e errësuar prej mëllefit për të sulmuar dhe për të anatemuar me çdo mjet Presidentin e Republikës, e cilësoi atë “gjenerali i ushtrisë së vdekur”.
Natyrisht, keqpërdorimi i titullit të romanit më të famshëm të letërsisë shqipe të shkrimtarit tonë të nderuar Ismail Kadare, më shumë sesa mosnjohje të historisë na dëshmon se individi në fjalë nuk e ka idenë farë se për çfarë bën fjalë romani, por kjo është një temë tjetër.
Referuar gojës që i artikuloi të tilla fyerje poshtëruese duke krahasuar të rënët me ushtritë e vdekura pushtuese, nuk do ta ulja veten të merresha e për më tepër, nuk do t’u imponohesha në këtë kohë juve duke iu referuar një personazhi që të gjithë e neverisni, por, për sa kohë këtë qëndrim e mban qeveria e Republikës së Shqipërisë, akti nuk është më vetëm provokatim, por një qëndrim i qellimtë, si pjesë e një strategjie që synon përmes përbaltjes dhe rivrasjes së të rënëve në Shqipëri dhe dhe dënimit të heronjve të UÇK-së në Kosovë, të vrasë identiteti tonë kombetar, synon të fshijë gjurmët e krenarisë së historisë tonë kombëtare, duan ta lenë atdheun pa dëshmorë e pa heronj!
Mirëpo, a mund të ketë atdhe pa heronjtë dhe pa dëshmorë?
Është e ligë përpjekja për të përfshirë në luftën politike të ditës, ata që i falën jetën dhe gjakun Shqipërisë.
Por, nëse dikush ndihet keq dhe nuk i pëlqen që Presidenti i Republikës nderoi në emër të shtetit dhe të popullit shqiptarë kapedanët e luftës së Vlorës të 1920-ës me Selam Musa Salarinë e Sali Vranishtin në krye dhe shumë e shumë të tjerë, dhe e përdor këtë fakt për interesa të ulëta politike të ditës duke thënë se Presidenti dhe varrmihësit e tij po merren me të vdekurit e para 100 viteve, dëshmon në thelb se çfarë ligësie mban, se çfarë ligësisë shpreh qeveria e Republikës së Shqipërisë ndaj kësaj lufte dhe jo vetëm ndaj saj, por ndaj të gjithë të rënëve në Shqipëri, ndaj gjithë të rënëve në Kosovë dhe të gjithë të rënëve të historisë tonë kombëtare.
Natyrisht, të tilla zëra ka patur dhe do të ketë, por është e pafalshme që të tilla zëra vijnë nga qeveria e asaj partie, pasardhëse e partisë që drejtoi Luftën Antifashiste Nacionalçlirimtare dhe ushqeu kultin e dëshmorit e të heroit në historinë e Shqipërisë.
Por, kjo është vetëm njëra prej shfaqjeve, është ky njëri prej episodeve të shëmtisë së qeverisë të Republikës së Shqipërisë ndaj të rënëve, prandaj ajo që duhet të bëjë sa më parë të paktën Partia Socialiste, nëse ka mbetur në radhët e saj ndonjë socialist, është distancimi dhe dënimi i të tilla deklaratave, i të tilla qëndrimeve që nuk i bëjnë nder, jo Partisë Socialiste, por askujt që i mendon apo i artikulon.
Lavdia dhe madhështia e dëshmorëve dhe heronjëve të Shqipërisë është e paprekshme, sepse ajo ndrin siç ndrijnë yjet në qiell, në historinë e Shqipërisë.
Ndaj, për të mos e zgjatur më tej, po e mbyll këtë qëndrim zyrtar në emër të Lëvizjes Socialiste për Integrim, se për cilindo që artikulon, që ushqen apo që nxit gojë të liga të thonë të tilla fyerje, si përgjigje vlen shprehja e mençur vlonjate, “nuk pëgëret deti, nëse fut turinjtë një mi”.