U përgjuan tre vjet me radhë pas një “informacioni” të Presidentit Nishani se “do vrisnin Lulzim Bashën”. Cilët janë dhe çfarë rezultoi nga hetimi

Një maqedonas dhe 2 kosovarë u hetuan për një kohë të gjatë si të dyshuar se po përgatisnin komplot dhe atentat ndaj kryetarit të opozitës Lulzim Basha, por pas tre viteve vëzhgim dhe veprimesh të tjera hetimore ata rezultuan të pa implikuar ndaj dhe çështja u pushua.

Të dyshuarit që kaluan në filtrat e Interpolit, Antiterrorit, dhe ish-Krimeve të Rënda janë Afrim Morina, një ish-polic në Gostivar dhe që përshkruhet si një person që është i gatshëm të bëjë gjithçka për para, Arben Ymeri i njohur me nofkën “Japan” praktikant radikal i fesë, ish-luftëtar në Siri dhe Alfred Gurguroviç, një i dyshuar i përfshirë në një krim në 2010 në Durrës.

Hetimi nisi me kërkesë të Antiterrorit në prill 2017, pas një interviste të presidentit Bujar Nishani, i cili tha se ka shumë aktorë që duan destabilitetin dhe se, gjithmonë sipas tij, siguria fizike e liderit të opozitës (pra Bashës) do të konsiderohet me seriozitet nga agjensitë ligjzbatuese në vend.

Pas kësaj deklarate në daljet publike të demokratit kishte shtim të forcave të sigurisë.

Prokuroria thotë se mes shumë veprimeve u kqyr sistemi Tims për të parë lëvizjet e kryera nga Morina, Ymeri dhe Gurguroviç. Gjithashtu janë administruar në dosje përgjimet e telefonatave të tyre.

Por as nga telefonatat e as nga përgjimet e tjera në Gmail dhe Facebook, prokuroria nuk gjeti të dhëna që të provonin “informacionet” e Presidentit të Republikës.

“Ky shtetas diskuton për probleme personale” – përmend Prokuroria në dosje lidhur me Morinën që e ka ndjekur atë gjatë lëvizjeve dhe telefonatat në Shqipëri e jashtë.

“Nuk janë gjetur lidhje të këtyre personave me të tjerë që të krijojnë bindjen për kryerjen e veprave të dyshuara dhe nuk janë konstatuar veprime që të vënë në rrezik jetën e kryetarit të PD” – lexohet në përfundimet e Prokurorisë.

Ky përfundim iu njoftua në mes të javës edhe Antiterrorit, ndërkohë që Gjykata do të vendosë vulën nëse duhet apo jo të pushohet hetimi.

Back to top button
LAJMET E FUNDIT