8 Dhjetori/ Meta: Koha për restart, për të guxuar dhe rivendosur demokracinë
30-vjetori i lëvizjes së parë studentore që solli edhe rrëzimin e regjimit komunist në Shqipëri është kujtuar nga e gjithë klasa politike shqiptare, ku një pjesë e tyre ka qenë edhe pjesë e saj dhe ende sot e kësaj dite janë pjesë e politikës shqiptare, apo drejtojnë shtetin.
Presidenti Ilir Meta, si një nga nga studentët e kësaj lëvizjeve asaj kohe me anë të një postimi në rrjetet sociale, shprehet se sot pas 30 vitesh është koha për restart dhe për të guxuar dhe për të rivendosur, sipas tij, demokracinë.
“KOHA PËR RESTART! Për rivendosjen e Demokracisë dhe Llogaridhënies! Për ta bërë Shqipërinë, si gjithë Europa! Unë besoj shumë në shpirtin energjik të të rinjve të Shqipërisë dhe në fuqinë e aftësive të tyre për ta transformuar dhe përmirësuar cilësisht të ardhmen e popullit tonë”, shprehet Meta, ndërsa vlerëson liderin e kësaj Lëvizjeje, Azem Hajdarin.
Postimi i plotë
Gëzuar 8 Dhjetorin 1990! Të bekuarën Ditën Kombëtare të Rinisë, Ditën e Studentëve, Ditën e Misionarëve që vranë frikën për të ndezur Pishtarin e Lirisë dhe Demokracisë në vendin e shqiponjave!
Sot përulemi me mirënjohje të veçantë ndaj Lidershipit Heroik të Azem Hajdarit dhe atyre djemve e vajzave, të cilët u përplasën të parët me Dhunën e regjimit, duke frymëzuar një popull të tërë për kryengritje paqësore.
Nderojmë shpërthimin e vullkanit të guximit marramendës rinor për të përmbysur regjimin më të ashpër izolues dhe shtypës në kontinent, por ndihemi dhe po aq borxhlinj që në tre dekada nuk kemi bërë aq sa duhet për të qenë aty ku e meritonin sakrificat e tyre.
KOHA PËR RESTART! Për rivendosjen e Demokracisë dhe Llogaridhënies! Për ta bërë Shqipërinë, si gjithë Europa! Unë besoj shumë në shpirtin energjik të të rinjve të Shqipërisë dhe në fuqinë e aftësive të tyre për ta transformuar dhe përmirësuar cilësisht të ardhmen e popullit tonë.
KOHA PËR RESTART! Për të guxuar! Për t’u bashkuar! Që Rinia të marrë në dorë fatet e saj dhe të mbarë vendit! Nëse jo Rinia, kush tjetër? Nëse jo sot, kur? DO T’IA DALIM ME SUKSES SEPSE NUK KEMI RRUGË TJETËR!