Rama: Dorëheqja e Ardi Veliut? Ta harrojnë: Ky shtet është i qytetarëve, jo i barbarëve!

Kryeministri Edi Rama ka reaguar ashpër pas ultimatumeve për largimin e drejtorit të përgjithshëm të Policisë së Shtetit Ardi Veliu. Në 3 postime në twitter, Rama ka deklaruar se “ta harrojnë” dorëheqjen e Veliut, ndërkohë ka paralajmëruar se dorëheqja e ministrit të Brendshëm nuk është dobësi dhe se shteti është i qytetarëve jo i barbarëve.

Postimi i plotë

Kërkojnë dorëheqjen e Drejtorit të Përgjithshëm të Policisë se ndryshe do djegin e shkatërrojnë? Ta harrojnë! Gabon shumë kush kujton se qytetaria e ministrit të Brendshëm është dobësi dhe harron se ky shtet është i qytetarëve jo i barbarëve! Pushteti merret me votë jo me djegie!

Policia e Shtetit as do merret dot peng, as do lëkundet dot nga politika e vjetër e dhunës e nga dhunuesit e nxitur prej saj! Policia e Shtetit nuk është një polic që vrau e që sot është në duart e drejtësisë dhe kush nuk do të respektojë ligjin do përballet me forcën e ligjit!

Ne nuk do të lejojmë askënd që të rrënojë çka është ndërtuar me mund e me punë të madhe dhe Policia e Shtetit është një nga shembujt e ndryshimit, që vazhdon me mundin e shumë njerëzve çdo ditë! Shantazhet dhe dhuna ndaj policisë nuk kanë lidhje as me lirinë as me demokracinë!/GazetaShqip