Pas ndarjes së banesave në Mitrovicë, Serbia do të ndërtojë spital në Graçanicë

Pas ndarjes së 36 banesave pa leje në Mitrovicë, Serbia do të ndërtojë edhe spital në Graçanicë, ka bërë të ditur drejtori i Zyrës për Kosovën në Qeverinë e Serbisë, Petar Petkoviq.

Petkoviq ka vënë në dukje se dorëzimi i 36 banesave në veri të Mitrovicës, të ndërtuara me fonde të Serbisë, është “vetëm një pikë loti në det”, bazuar në atë që do të bëhet e do të ndihmohet.

Petkoviq, në një intervistë për uebfaqen e Partisë Përparimtare të Serbisë, ka theksuar se në radhë është ndërtimi i një spitali në Graçanicë në vlerë mbi gjashtë milionë euro.

“Para nesh është ndërtimi i spitalit në Graçanicë. Është e natyrshme që po i gëzohem kësaj, pasi populli ynë pas një dekade neglizhencë, mund ta shohë se Serbia sinqerisht kujdeset për qytetarët e saj”, ka thënë Petkoviq.

Petkoviqi ka thënë se “me ndihmën e Serbisë është luftuar edhe COVID-19” në mjediset ku jetojnë serbët.

Qeveria e Serbisë të mërkurën ndau 36 banesa për çiftet serbe në Mitrovicë të Veriut. Këto banesa, janë pa leje ndërtimi dhe pa pëlqim urbanistik nga institucionet e Kosovës, mirëpo ato dhe shumë të tjera janë ndërtuar viteve të fundit.