“25 Prilli, dita e triumfit”/Thirrja e Metës: Një popull që fle në demokraci, rrezikon të zgjohet në diktaturë

Presidenti Ilir Meta ka shfrytëzuar 70-vjetorin e ngjarjes së vendosjes së bombës në ambasadën sovjetike në Tiranë për të përçuar mesazhet e tij politike për zgjedhjet e 25 prillit.

Me anë të një postimi në Facebook kreu i shtetit e cilëson ditën e zgjedhjeve si një triumf të demokracisë dhe fuqisë së votës së çdo qytetari.

Ai shkruan se ngjarje e ekzekutimit të 22 intelektualëve shqiptare kujton se “demokracia duhet të mbrohet çdo ditë dhe me çdo sakrificë”.

Postimi i plotë

Me akuzën e stisur të hedhjes së një bombe në ish-Legatën Sovjetike në Tiranë, sot mbushen 70 vjet nga dita kur 22 intelektualë të shquar, qytetarë të pafajshëm, të ndershëm dhe atdhetarë, të lidhur tok me tela me gjëmba, u ekzekutuan barbarisht me pushkatim, pa gjyq.

Kjo masakër e llahtarshme, e kryer brenda një nate, simbol i terrorit ndaj mendimit ndryshe, është një nga krimet më të rënda shtetërore të atij sistemi, që kurrë nuk duhet të harrohen, për të mos lejuar më të tilla tragjedi të përsëriten në të ardhmen.

Duke nderuar kujtimin e viktimave të pafajshme Sabiha Kasimati, Tefik Shehu, Pjetër Guraziu, Jonuz Kaceli, Anton Delhysa, Haki Kodra, Gafur Jegeni, Myftar Jegeni, Manush Peshkëpia, Reiz Selfo, Qemal Kasaruho, Zyhdi Herri, Gjon Temali, Petro Konomi, Niko Lezo, Pandeli Nova, Thoma Katundi, Mehmet Shkupi, Ali Qorralliu, Fadil Dizdari, Hekuran Troka dhe Lluka Rashkoviç, masakra e 26 shkurtit 1951, na kujton sot se demokracia duhet të mbrohet çdo ditë dhe me çdo sakrificë.

Sepse “një popull që fle në demokraci, rrezikon që një ditë të zgjohet në diktaturë”. Ndaj 25 prilli do të jetë Dita e Triumfit të Demokracisë dhe Fuqisë së Votës të çdo qytetari të Republikës.