A do mbyllemi në 18:00? Përgjigjet Albana Fico, çfarë pritet sot nga Komiteti Teknik
Shpërthimi i rasteve me covid ditët e fundit ka bërë që të ketë një shtim të zërave që kërkojnë shtrëngimin e masave. Në media është paralajmëruar se mund të ketë zgjerim të orës policore dhe mbyllje që në 18:00, por ende asgjë nuk është zyrtare.
Drejtoresha e ISHP, Albana Fico tha mbrëmjen e djeshme se asnjë masë nuk ka vlerë nëse nuk respektohet nga qytetarët. Në një deklaratë, Fico nuk dha detaje se çfarë vendimi pritet të merret sot nga Komiteti Teknik i Ekspertëve sa i takon masave anti-Covid.
Pyetje: Nesër ose në komunikimin e radhës nga Komiteti Teknik i Ekspertëve, do të mbyllemi në orën 18:00 siç është folur një skenar edhe më herët nga ana e kolegëve tuaj zonja Fico? Dhe mbi të gjitha, kur do të kemi skenarin e radhës që është shkollat të gjitha online siç na deklaroi anëtari i Komitetit zoti Koraqi
Fico: Nuk e kam ndjekur deklaratën e profesor Koraqit, po unë po të them praktikën. Unë sot nuk e kam përgjigjen, po ta kem praktikën..
Pyetje: Sipas jush, duhet të mbyllemi më herët për shkak të masave dhe asaj që po ndodh në terren?
Fico: Unë besoj asnjë masë e cila, le të themi, paralajmërohet dhe nuk zbatohet, nuk ka asnjë vlerë. Kjo është qasja ime. Nuk ka vlerë të marrësh masa dhe të mos i zbatosh. Ne bëjmë debate, shikojmë opsione, por besoj që vendimmarrja ka qenë ajo, masat kanë mbetur në fuqi, kemi një lloj selektiviteti në raport me mësimin online të shkollave.
Të jeni shumë të sigurt që në momentin që dakordësohet një masë e cila është e mbështetur nga elementë të gjithanshëm, në radhë të parë shëndeti dhe më pas të gjithë tjerat, do t’ju komunikohet. Ne bisedojmë si në të gjitha grupimet ku ka një përgjegjësi të veçantë, me mendime secili, por në fund duhet të ketë një dakordësi që u shërben të gjithëve. Por edhe njëherë, edhe 100 herë, ju lutem të gjithëve, jo vetëm s’e kemi fituar betejën, mos harroni që jemi ende në dimër… çështja është që ne deri tani, kemi vetëm një gjë në dorë, të zbatojmë masat, ju lutem”.