La mandatin për të ndjekur pasionin e tij/ Pse u rikthye Eduart Halimi në PD, çfarë deklaronin ai dhe Basha në 2018

Në shkurt 2018, Eduart Halimi njoftoi lënien e mandatit të deputetit dhe largimin nga PD dhe skena politike.

E gjitha lidhej me arsye profesionale, pasi kishte vendosur t’i bashkohej një projekti.

“Sot kam dorëzuar mandatin e deputetit pasi nga nesër i përkushtohem një projekti të së drejtës ndërkombëtare private në një network në Ballkan, projekt që është afatgjatë dhe kërkon që vendimin ta marr sot”, njoftonte ndër të tjera Halimi, teksa sqaronte largimin e tij nga politika.

Për largimin e Eduart Halimit nga politika reagoi edhe kryedemokrati Basha , ku përmes një postimi në facebook njoftoi dorëheqjen e ish-ministrit të PD-së nga funksionet brenda partisë.

“Eduart Halimi vendosi sot të lërë mandatin e deputetit, të tërhiqet nga politika aktive për të ndjekur pasionin e tij, avokatinë. Dëshira ime për ta patur pjesë të ekipit, të grupit parlamentar të PD ishte e madhe, por po kështu edhe respekti për lirinë e çdokujt për të marrë vendimet e veta për të ardhmen e tij”, shkruante Basha në 2018.

Por 3 vjet më vonë, ish-ministri i drejtësisë është rikthyer në shtëpi.

Me ftesë të Lulzim Bashës, mësohet se Eduart Halimi do të bëhet koordinator i posaçëm i Partisë Demokratike për procesin zgjedhur, por nuk do të kandidojë për deputet.

Halimi ka qenë deputet i Partisë Demokratike gjatë tre legjislaturave. Ai ka shërbyer edhe si Ministër i Drejtësisë gjatë qeverisjes Berisha.

Mesazhi i plotë i Halimit në 2018

“Te dashur miq. Për mua ka qënë një privilegj të zgjidhem për të tretën herë deputet i Kuvendit të Shqipërisë. Gjatë këtyre viteve kam kontribuar më përkushtim të plotë në politikë si njeri i çështjeve të drejtësisë.

Sot kam dorëzuar mandatin e deputetit pasi nga nesër i përkushtohem një projekti të së drejtës ndërkombëtare private në një netëork në Ballkan, projekt që është afatgjatë dhe kërkon që vendimin ta marr sot.

Kam qënë një njeri me fat në këto vite sepse kam pasur në krah bashkëpuntorë të shkëlqyer, të përkushtuar e të ndershëm me kontributin e te cilëve arrita të lija gjurmë, por mbi të gjitha që kam dalë faqebardhë nga të gjithë detyrat që kam pasur. Me punën e tyre ata i hoqën mundësinë kundërshtarëve politikë të hidhnin ndaj meje dhe atyre, baltën e kudogjendur në politikë. Ndaj dua ti falenderoj ata të gjithë sot publikisht.

Dua të falenderoj Sali Berishën, që më dha mundësinë të kontriboj ne jetën politike të vendit në këto vite. Falenderoj Lulzim Bashën, për besimin në detyrat politike prej 2013, për bashkëpunimin e shkëlqyer në këto vite dhe për mirëkuptimin në çdo vendim prej ditës së parë e deri më sot.

Falenderoj të gjithë kolegët e nderuar të grupit parlamentar për gjithë bashkëpunimin në këto vite në politikë. Së bashku ne i bëmë një shërbim të madh vendit me paketën ligjore të dekriminalizimit dhe paketën kushtetuese të drejtësisë në 22 korrik 2016.

Falenderim dhe mirënjohje për gjithë votuesit e PD në qarkun e Durrësit dhe Beratit që më zgjodhën 3 herë deputet të Kuvendit. Kontributi im në Partinë Demokratike do të vijojë për gjatë gjithë jetës sime si një antar i thjeshtë dhe i përkushtuar. Falenderim mediave dhe gazetarëve të palodhur për bashkëpunimin në këto vite. Shihemi së shpejti në një hapësirë tjetër të rrjeteve sociale. Ju faleminderit të gjithëve, Eduard Halimi”, shkruante Halimi. /Gazeta SHQIP