Rusia thirrje shtetasve të vet: Shqipëria na hoqi vizat, ejani!

Në prag të nisjes së sezonit veror, qeveria shqiptare ka marrë vendimin për heqjen e vizave për shtetasit rusë. Të gjithë shtetasit e Federatës Rusë mund të vijnë në vendin tonë pa pasur nevojë për një vizë dhe kjo nga 1 prilli deri më 31 dhjetor.

Lajmi është i ditur nga vetë ambasada ruse me anë të një postimi në rrjetet sociale.

“Është miratuar Vendimi i Këshillit të Ministrave të Shqipërisë Nr. 214, dt. 25 Mars 2021, për heqjen e vizave për shtetasit e disa vendeve, përfshirë këtu edhe Rusinë, për periudhën 1 prill – 31 dhjetor 2021. Afati i lejuar i qëndrimit në vend është 90 ditë në çdo periudhë 180-ditore, duke filluar nga data e hyrjes”, thuhet në njoftimin e ambasadës. Kështu çdo shtetas rus që mund të vijë në Shqipëri ka të drejtën të qëndrojë deri në tre muaj.

Ky shihet si një vendim favorizues do të ndikojë në thithjen e sa më shumë turistëve të huaj. Siç dihet rusët preferojnë më tepër që të shkojnë drejt Malit të Zi dhe Greqisë. Gjithashtu ato në sezonin veror “pushtojnë” bregdetin turk.