Berisha paralajmëroi padi ndaj sekretarit Blinken, vjen reagimi i parë nga SHBA

Pas deklaratës së ish-Kryeministrit Sali Berisha për padi ndaj sekretarit Antony Blinken ka ardhur edhe reagimi i Departamentit Amerikan të Shtetit.

Një zëdhënës i DASH i tha Zërit të Amerikës se “nuk janë në dijeni të ndonjë padie gjyqësore”.

Dje, Sali Berisha deklaroi në një konferencë për mediatse i ka shpallur “luftë”  Sekretarit amerikan të Shtetit, Antony Blinken, ndaj të cilit do ngrejë një padi për shpifje. Ish-kreu i qeverisë ka thënë se padia do të ngrihet në Francë, në një shtet neutral dhe tha se sipas avokatit të tij Sekretari Blinken nuk mund të ketë mbrojtje për shkak të detyrës së tij.

“Jam këtu për të informuar ju, për një vendim të pazakontë por të rëndësishëm. Për arsye që janë tërësisht që janë të panjohura për mua, Sekretari Amerikan i Shtetit, ka publikuar dje pa asnjë paralajmërim dhe në mënyrën më shpifëse një vendim për mua. Dua të theksoj se në të gjithë jetën time politike, por mund të shkoni dhe më tutje që kur kam prekur rrogën e parë, e deri më sot nuk ka njeri në Shqipëri apo në botë që të thotë që unë jam i implikuar në një aferë korruptive. Ndaj dhe unë kam autorizuar avokatin tim në një vend neutral në Francë që të ngre një padi kundër zotit Blinken për shpifje publike në Gjykatën e Parisit”, ishte kjo një pjesë e deklaratës së Berishës.

Berisha tha se vendimi i DASH i ka prekur “dinjitetin” dhe theksoi se beteja do të jetë kundër Blinken dhe jo kundër SHBA. Gjithsesi, vendimi duhet thënë se nuk është marrë nga Blinken, por nga shteti amerikan. Kështu që “lufta” e Sali Berishës është ndaj SHBA dhe jo ndaj zotit Blinken.

Një zëdhënës i Departamentit të Shtetit i tha Zërit të Amerikës se "nuk janë në dijeni të ndonjë padie gjyqësore" në përgjigje të deklaratës së zotit Berisha për të ngritur padi ndaj Sekretarit Blinken për shpifje.

— VOA Shqip (@zeriamerikes) May 20, 2021