Rihapet dosja e 21 Janarit/ Ngjela: Krim historik, Berisha të hetohet i pari

Avokat Spartak Ngjela ka folur në një lidhje skype me emisionin “Breaking” në Top News lidhur me lajmin e bujshëm të ditës së sotme për rinisjen e hetimit për vrasjen e Aleks Nikës në protestën e 21 janarit 2011.

Ngjela tha se ai ishte një krim historik, për të cilin duhet të hapet i gjithë procesi. I pyetur nga moderatorja Sidorela Gjoni, Ngjela tha se rihapja e këtyre dosjeve është një lajm shumë i mirë për të kthyer besimin e shqiptarëve tek Drejtësia.

“Duhet të hapet i gjithë procesi, janë vrarë katër veta. Në një protestë ku nuk kishte përplasje mes shtetit dhe qytetarëve. Edhe sikur të kishte, nuk vriten njerëzit. Është krim historik.

Hapja e gjithë këtyre proceseve është shenjë e mirë e luftës së drejtësisë kundër krimit dhe korrupsionit. Është diçka shumë e mirë, na jep besim. Se ky ka qenë një shtet i pushtuar nga krimi.

Pushteti gjyqësor shqiptar ka qenë i mbuluar nga krimi, vetë i përfshirë në krim përmes korrupsionit. Dalja e SPAK në skenë, e cila është e kontrolluar në funksion të drejtësisë, do ta ndërmerrte këtë hap. Se ajo është një ngjarje me efekt negative në histori.

Do kemi ekspertizë ndërkombëtare, dhe do shohim një hetim profesional dhe ne shqiptarët të krijojmë kështu besim te drejtësia. Duhet të hetohet Berisha i pari dhe pastaj dhe ministri i Mbrojtjes” tha Ngjela.