Albin Kurti dhe Vjosa Osmani i kërkojnë ministrit grek njohjen e Kosovës

Kryeministri i Kosovës, Albin Kurti, pas takimit me ministrin e Jashtëm të Greqisë, Nikos Dendias në Prishtinë, i ka kërkuar atij njohjen e Kosovës.

“Kurti përsëriti kërkesën për njohjen e pavarësisë së Kosovës nga shteti helen dhe theksoi rëndësinë që ka liberalizimi i vizave për qytetarët e Kosovës”, thuhet në komunikatën e Zyrës për media të Kryeministrit.

Ministri Dendias është pritur gjithashtu edhe nga Presidentja e vendit, Vjosa Osmani. Kjo e fundit deklaroi se vendosja e marrëdhënieve diplomatike në mes të dy shteteve, do të kontribuonte në zhvillimin e rajonit.

Në një njoftim për media thuhet se presidentja Osmani ka theksuar se marrëdhëniet ndërmjet të dy vendeve janë të mira dhe ka potencuar se njohja e Kosovës nga Greqia do t`i thellojë edhe më tej marrëdhëniet bilaterale e multilaterale ndërmjet të dy vendeve.