Ukraina refuzon të lejojë udhëtimet tranzit, turistët bjellorusë mbeten të bllokuar në Shqipëri, Tunizi dhe Mal të Zi

Turistët bjellorusë që vizituan Shqipërinë, Malin e Zi dhe Tunizinë kanë mbetur të bllokuar në këto vende për shkak të refuzimit të Ukrainës për të lejuar udhëtimet tranzit të kompanisë “Belavia”.

Lajmi është bërë i ditur nga ministria e Jashtme e Bjellorusisë, e cila ka thënë se është bërë e mundur kthimi i 1000 qytetarëve përmes Rusisë, por qindra të tjerë kanë mbetur të bllokuar.

“Po merren masat e nevojshme për kthimin e shtetasve tanë nga Shqipëria, Tunizia dhe Mali i Zi.

Ne tashmë kemi arritur të kthejmë më shumë se një mijë njerëz, kryesisht përmes territorit të Rusisë . Në këtë situatë, pozicioni i Ukrainës duket sinqerisht çnjerëzor, autoritetet e së cilës refuzuan të lëshojnë leje të nevojshme për tranzitin e fluturimeve humanitare të Belavia “, tha ministria.