Varianti “Delta”, Brataj tregon grupin më të rriskuar për t’u prekur nga ky mutacion

Kreu i Urgjencës, Skënder Brataj ka folur lidhur me rrezikun e variantit “Delta” të Covid-19.

Ai ka thënë se të pavaksinuarit janë grupi më i rriskuar për t’u prekur prej këtij mutacioni dhe për ta shpërndarë atë në qytetarët e tjerë.

“E veçanta e kësaj periudhe me këtë lloj virusi është fakti i infektimit të personave që nuk janë vaksinuar, por edhe atyre që kanë aplikuar një dozë deri më tani. Ndërsa vaksinimi me të dyja dozat e ka ulur me një përqindje shumë herë më të lartë përhapjen e këtij varianti”, tha Brataj në një intervistë për “Klan”.

Më herët edhe ministria e Shëndetësisë, Ogerta Manastirliu teksa foli për lehtësimin e masave anti-Covid ngriti alertin nga variant “Delta”, gjithashtu u bëri thirrje për vigjilencë.

Kujtojmë se variant “Delta” i koronavirusit është shfaqur për herë të parë në Indi në tetor të vitit të kaluar dhe që atëhere është përhapur në më shumë se 80 vende të botës.