“Po të kisha vrarë një njeri…”/ Quajti policët “barkderra”, Ndreu sqaron përplasjen me efektivët

Kryetari i Bashkisë së Lezhës, Pjerin Ndreu, ka komentuar ngjarjen e rëndë të ndodhur pak ditë më parë në Shëngjin, ku u përplas me disa policë, për shkak të shkeljes së orës policore.
Kryebashkiaku Ndreu ka deklaruar për news24, se ai ishte në një darkë zyrtare me 15 kryetarët e komunave, për hapjen e sezonit turistik, dhe policët sipas tij, nuk kishin vepruar me gjobë për shkeljen e orës policore, por kishin ndërhyrë forcërisht dhe me dhunë.
Teksa kërkoi ndjesë publike për termin e përdorur ndaj policëve “barkderra”, Ndreu theksoi se policia nuk mund t’i tejkalojë kompetencat e saj.
“Në përgjithësi ora policore respektohet, ka dhe raste kur nuk respektohet. Nuk është bërë fjalë asnjë herë që nuk ka pasur shkelje, por për mënyrën si është ndërhyrë, sepse për shkelje të orarit nuk ndërhyhet forcërisht. Ndëshkimi me gjobë është masa reale që merret. Nuk duhet të kapërcehet masa e fajit me ndëshkimin. Unë isha në një darkë, ishte nata e hapjes së sezonit turistik. Kishim ftuar 15 kryetarë komunash, që kontribuojnë. Ne shtruam një darkë komplet zyrtare, të qetë, pa pjesëmarrjen as edhe të një personi të inkriminuar. Fatkeqësisht duhet thënë se lokalet në përgjithësi në Shëngjin kanë qenë hapur. E theksoj se në raste të tilla ndërhyhet me gjobë, jo me dhunë. Janë bërë disa veprime të paligjshme, në kapërcim të kompetencave. Jam shumë i shokuar nga mënyra e interpretimit të mediave, po të kisha vrarë një njeri do ta kishin interpretuar më pak.
Aty isha në një darkë zyrtare dhe nuk mund të justifikohet një ndërhyrje me dhunë. Normal që unë nuk ju thoja dot të qoheshin kryetarët e komunave, por gjoba është masa normale. Nuk është rasti për t’u etiketuar vetëm unë në këtë rast, mund të etiketohesha nëse do të isha nën shoqërinë e ndonjë personi problematik. Unë e njoh mirë këtë mënyrë të vepruari të policisë, por nuk duhet të ndodhë kapërcimi i kompetencave. Kam mbajtur qëndrim, që mund të disponohen me gjobë, por jo me akte të tjera, që nuk më pëlqen t’i bëj publike. Gjithsesi duhet të them se nuk duhet përgjithësuar e gjithë policia. Termi ‘barkderra’ ka qenë reagim emocional, për shkak të interpretimit të mediave. Ndërsa e shajnë policinë në mënyrë permanente, mjafton një kërkesë e një drejtuesi lokal, për t’u interpretuar në media sikur aty u mbrojt një person i inkriminuar. Ishte reagim emocional, i momentit, për të cilin unë kërkoj ndjesë sigurisht. kam qenë mbrojtësi më i zjarrtë i policisë, nuk ka ndodhur kurrë ta sulmoj”, ka thënë Ndreu.
Rama: Të përgjigjet për gabimin
Pas ngjarjes, Edi Rama tha se të gjithë mund të gabojnë dhe të gjithë duhet të përgjigjen për gabimet e tyre, por nuk do ketë tolerim ndaj zyrtarit të lartë.
“Kur vjen puna për ofendimin e policisë askush nuk ka të drejtë dhe nuk mund t’ia hedhë lehtë. Por policisë I bëhet edhe një ofendim tjetër i vazhdueshëm, i përditshëm, kur I hidhet faji për çdo gjë që ndodh. Kush është ofendim më i madh se ofendimi individual I një personi, sepse ai ofendim zgjidhet. Unë do shqetësohesha nëse policia nuk do kishin ndjekur rrugën ligjore. Të gjithë mund të gabojnë dhe të gjithë duhet të përgjigjen për gabimet e tyre. Në këtë rast nuk kemi një tolerim të faktit që një zyrtar i lartë ofendon një patrullë apo një grup punonjësish policie”, tha Rama.