Zyrtare! Rama: Lindita Nikolla, kryetarja e re e Kuvendit të Shqipërisë

Lindita Nikolla do të jetë kryetarja e re e Kuvendit të Shqipërisë.

Lajmi u konfirmua në Asamblenë e PS nga vetë kryeministri Rama duke u shprehur se Nikolla do të zëvendësojë kështu Gramoz Ruçin.

Ethet e qeverisë Rama 3 sapo kanë nisur, disa nga socialistë e vjetër po largohen nga qeveria me dëshirën e tyre, i tillë ishte rasti i Erion Braçes i cili tha se nuk do të jetë pjesë e kabinetit Rama 3.

Biografia e Lindita Nikollës

Lindita Nikolla lindi në Tiranë, më 22 Tetor 1965. Ajo është e martuar me Z. Ligor Nikolla dhe ka një vajzë që quhet Livia. Znj. Nikolla, në korrik 2010 ka kryer studimet Master në Administrim Publik, drejtimi Pushtet Ekzekutiv, pranë Albanian University dhe në vitin 1989 ka përfunduar studimet universitare pranë Fakultetit të Shkencave të Natyrës, dega  Matematikë, Universiteti i Tiranës. Ajo ka hyrë në politikë në vitin 2003. Gjatë viteve 2003–2006 është zgjedhur si Këshilltare e Këshillit të Njësisë Bashkiake Nr.1, Tiranë. Është zgjedhur për dy mandate në periudhën 2007-2011 dhe 2011-2013, Kryetare e Njësisë Bashkiake Nr.1 Tiranë. Në zgjedhjet e 23 Qershorit 2013, zgjidhet deputete e qarkut të Tiranës.

Nga shtatori i vitit 2007, znj. Nikolla është anëtare e Kryesisë së Partisë Socialiste. Në vitin 2006 ka përfunduar Akademinë për Udhëheqësi dhe Reformë pranë Institutit për Demokraci dhe Ndërmjetësim (NDI) në Tiranë dhe në qershor të vitit 2008 ka kryer Akademinë mbi Policimin Komunitar dhe Qeverisjen Vendore në Universitetin e Pitsburgut, SHBA. Znj. Nikolla ka kryer gjithashtu një sërë kualifikimesh në menaxhimin e shkollës dhe mësimdhënien e matematikës, si dhe për fuqizimin e gruas në vendimmarrje. Znj. Nikolla zotëron gjuhën angleze dhe njeh gjuhën frënge e atë italiane./Gazeta Shqip