Një kamp refugjatësh të paligjshëm në Shqipëri? Reagon këshilltari i Ramës

Lidhur me lajmin e të përditshmes britanike “The Sun” se të gjithë emigrantët e paligjshëm që do të kapen në Francë-Angli do të strehohen në Shqipëri, ka reaguar vetë këshilltari i kryeministrit Edi Rama, Endri Fuga.

Shqipëria do të jetë destinacioni për të gjithë emigrantët që kalojnë kanalin në kufirin mes Francës dhe Anglisë. Kërkesat e tyre për azil do të shqyrtohen gjatë kohës që ata janë në Shqipëri.

Britanikja “TheSun” në një artikull ekskluziv shkruan se ministrja angleze Priti Patel shpreson se ky vendim do të pengojë emigrantë që planifikojnë të bëjnë kalimin e rrezikshëm. Duke folur për mediat ajo tha se qeveritë “duhet të jenë në gjendje të marrin në konsideratë çdo mundësi të vetme” kur merren me azilkërkuesit.

Megjithatë Endri Fuga në një postim në rrjetet sociale shkruan se diçka e tillë nuk është aspak e vërtetë

“Lajmi se Shqipëria do ngrejë një qendër azilantësh për llogari të palëve të treta është absolutisht i pavërtetë. Shqipëria hapi dyert për 4 mijë afganë dhe jemi krenarë për këtë. Ne bëjmë detyrat tona karshi traditës e fëmijëve tanë, jo detyrat e atyre që janë më të mëdhenj e më të pasur se ne,” shkruan Fuga.