“Kafshë, bisha, barbarë”!/ Rama thirrje demokratëve: Të bashkohemi ta çlirojmë politikën, vendi s’ka opozitë, problemi janë Hoçi-Doçi
Kryeministri Edi Rama u ka bërë thirrje demokratëve që të bashkohen dhe ta çlirojnë politikën e këtij vendi.
Rama në një komunikim online tha se në vendin tonë nuk ka opozitë, pasi sipas tij nuk quhet opozitë ajo që të sfidon politikisht. Ai shtoi se “ne nuk jemi barbar mesjetar dhe ndaj duhet ta çlirojë politikën”
“Duhet të bëjmë çmos të gjithë së bashku që ta çlirojmë politikën e këtij vendi, që na mban peng të gjithë, prej ndasisë thellë dhe të një urrejtje të brendshme mes të dyja kampeve. Duhet me patjetër të gjendet rruga që kacafytje të mbarojë. Mos të kemi më skena të tilla. Demokratët do ta gjejnë vet atë që duhet të udhëheq.
Ky vend nuk ka sot opozitë, jo sepse ndodhi ajo dje, por ka kohë. Nuk është opozitë ajo që është shfaqur përpara nesh gjithë këto vite. Një opozitë që të sfidon fizikisht nuk është opozitë dhe është e destinuar të humbasë në vijim. Ato që dje ishin të ndarë kanë qenë për vite të tëra bashkë.
Iu bëj thirrje demokratëve të çlirojmë politikën për të mos vazhduar t’ju marrin për budallenj, siç ju kanë bërë gjatë gjithë kësaj periudhe. Thanë hajde djegim mandatet se do të rrëzojmë Ramën. Nuk është personale, e as partiake thirrja, kjo është shoqërore, shqiptare njerëzore. Ku ka bërë kjo vaki në cilën pyll e xhungël ka bërë kjo vaki që mbështetësit e opozitës sulmojnë selinë e partisë së tyre. Më marrim miq e huaj më thonë është fake news apo e vërtetë, njerëz me shkallë si jeniçerë, me shkopinj bejszbolli, me çekik, e kaçavida, vetëm zjarri mundonte që t’i hidhnin të tjerëve. Kjo shkon përtej të gjithëve. Po të ishte ndryshe unë nuk dilja e të flisja, rrija në shtëpi e thosha të vrasin veten dhe të vazhdojnë, nuk ia vlejnë të shkatërrohen njerëz dhe imazhi i këtij vendi. Këta dy Hoçi-Doçi janë problemi”, tha Rama.
Pjesë nga fjala e Ramës:
Të gjitha gjërat i kanë bërë bashkë të dy ato, në të gjitha këto vite. Kjo është histori e një mbetje politike e ndarë në gjysmë. E ndarë në një kufomë politike me seli SHQUP-in dhe një kufomë politike pa seli, që është në listën e zezë. Të dy bashkë, deri dje, ishin një. A nuk ju imponua Lulzim Basha demokratëve pikërisht nga Berisha? Tani të dalësh e të thuash që nuk e kam njohur Berishën, është të tallësh ndenjësen.
Dje policia mbajti të njëjtin standard që ka mbajtur edhe në sulmet që i janë bërë Kryeministrisë. Policia nuk ka ndërhyrë, kur protestuesit janë marrë me muret, por ajo ndërhyri, pasi si pala jashtë, edhe ajo brenda, papërgjegjshmërisht, ishte e gatshme për gjakderdhje, për të përdorur njerëz si viktima. Ata janë udhëheqës pa vizion, pa pikën e turpit. Policia ishte aty, patjetër. Policia meriton përgëzime për gjithçka bëri dje, në një situatë jashtëzakonisht të vështirë, unikale, në kushte shumë të rrezikshme, provokative, të ulëta, të poshtra, të pabesa. Sa i përket masave, policia e prokuroria nuk kanë bërë dallime nga brenda apo jashtë, por janë marrë me të dyja palët dhe kush është përfshirë në dhunim, do të mbajë përgjegjësi.
Nuk mund të thuash që ne i përdorim ato fikëset e zjarrit për të mbrojtur demokracinë. Nuk mund zotërote të përdor fikëse zjarri për të mbrojtur demokracinë, e të çosh njerëzit në spital. Për të mbrojtur demokracinë përdoren zgjedhjet e lira e të ndershme brenda partisë. Dy palë viktima, dy palë mish për top, nga dy kufoma, që vijnë vërdallë brenda e jashtë godinës si udhëheqës. Udhëheqësit e karvanëve mesjetare, udhëheqësit e qetave të vitit të mbrapsht? Udhëheqësit e kujt? Unë nuk mbroj kaq shumë Lulin tim, nuk kam asnjë lloj respekti, më vjen keq ta them hapur, as për Lulin tim, as për Saliun tënd. Janë të dy pengmarrës të demokratëve, por edhe të skemës demokratike të Shqipërisë.
Tani zihen me kë jam unë, i kujt jam unë, kush më ka marrë mua peng e kush më jep mua oksigjen! Jo, unë sigurisht mund të argëtohesha, por mendoj se demokratët duhet ta zgjidhin vetë, për të kuptuar se asnjëri prej tyre nuk ju thotë të vërtetën, vetëm i tërheqin prej hunde, siç kanë bërë tërë këto vite. Ju humbisni.
Po të ishte për Lulin e Saliun, do më pëlqente shumë dhe nuk do të kisha keqardhje, por është puna te dëmi i madh që i bëhet vendit, për shkak të këtyre dyve. Unë i kam mundur të dy dhe i mund prapë të dy, madje jo të dy, por të tre, se janë tre. Nuk është personale kjo, as partiake, por është shoqërore, morale, njerëzore. Nuk mund të jemi një vend që na tregojnë me gisht si njerëz me bisht, ku del e merr dhen lajmi se mbështetësit e PD sulmuan godinën e PD. Është e paimagjinueshme, unë ndjehem i turpëruar si shqiptar, kur më marrin miq e më pyesin, se nuk e kuptojnë çfarë është. Me shkallë, me çekiç, me varre, matrapik, grushte e fikëse zjarri, me shkopinj, me gurë, e me çfarë dreqi, mungonin vetëm kovat me zink që të hidheshin lart.
Duhet kapërcyer ky llum 30-vjecar, llum që shkon përtej socialistëve e demokratëve, përtej partive, përtej të gjithave. Unë rrija në shtëpi e fërkoja duart, vrafshin veten, por kjo shkatërron imazhin e vendit. Këta dy, Hoçi-Doçi, nuk janë problemi im, por i demokratëve. Unë ju them demokratëve që jemi të gjithë shqiptarë, por mbi të gjitha jemi njerëz, jo bisha, kafshë, majmunë, mesjetarë, barbarë. Politika nuk është dhe s’mund të jetë logjikë e forcës, por logjika e forcës. Nuk mund të katandiset politika në një luftë me çekiçë e fikëse zjarri syve. Ju lutem demokratëve t’iu varin teneqen të dyve dhe të gjejnë rrugën për të shpëtuar PD. Unë jam i gatshëm t’i ndihmoj, në çfarëdo qoftë.