Biden jep aprovimin për sanksionet ndaj gazsjellësit “Nord Stream 2”: Putin nxiti botën që të largohet nga gazi rus

Shtëpia e Bardhë ka lëshuar një deklaratë nga Joe Biden, duke konfirmuar vendimin e presidentit për të vendosur sanksione ndaj Nord Stream 2.
“Që kur Rusia filloi dislokimin e trupave në kufirin ukrainas, Shtetet e Bashkuara kanë punuar ngushtë me aleatët dhe partnerët tanë për të dhënë një përgjigje të fortë dhe të unifikuar. Siç thashë kur u takova me kancelarin Scholz në fillim të këtij muaji, Gjermania ka qenë një lider në këtë përpjekje dhe ne kemi koordinuar nga afër përpjekjet tona për të ndaluar gazsjellësin Nord Stream 2 nëse Rusia pushton më tej Ukrainën .
Dje, pas konsultimeve të mëtejshme të ngushta mes dy qeverive tona, Gjermania njoftoi se do të ndalonte certifikimin e gazsjellësit. Sot, kam urdhëruar administratën time të vendosë sanksione ndaj Nord Stream 2 AG dhe oficerëve të saj të korporatës. Këto hapa janë një pjesë tjetër e këstit tonë fillestar të sanksioneve në përgjigje të veprimeve të Rusisë në Ukrainë. Siç e kam bërë të qartë, ne nuk do të hezitojmë të ndërmarrim hapa të mëtejshëm nëse Rusia vazhdon të përshkallëzohet.
Nëpërmjet veprimeve të tij, presidenti Putin i ka dhënë botës një nxitje dërrmuese për t’u larguar nga gazi rus dhe nga format e tjera të energjisë. Dua të falënderoj kancelarin Scholz për partneritetin e tij të ngushtë dhe përkushtimin e vazhdueshëm për ta mbajtur Rusinë përgjegjëse për veprimet e saj”, thuhet në deklaratë.
Projekti prej 10 miliardë eurosh përfundoi gjatë muajit shtator të vitit të kaluar.
Vendimi i SHBA vjen pasi kancelari gjerman, Olaf Scholz njoftoi se tubacioni do të qëndronte i mbyllur në përgjigje të lëvizjeve të Rusisë kundër Ukrainës.
Shtetet e Bashkuara kanë bërë të ditur se brenda 48 orëve, Rusia pritet ta pushtojë në total Ukrainën, pas dislokimit të disa trupave në dy rajonet që kanë shpallur pavarësinë e njëanshme, Donatsk dhe Luhanski.