BE “godet” kokat e Rusisë, do ngrijnë asetet e Putin dhe të Lavrov

BE do të ngrijë asetet evropiane të Presidentit rus Vladimir Putin dhe ministrit të Jashtëm, Sergei Lavrov.

Siç rtaporton BBC, ky vendim vjen edhe pas sanksioneve që BE dhe SHBA vendosen ndaj Rusisë, e cila nga dita e djeshme 24 shkurt po vazhdon me sulmet ne Kiev.

Ndërkohë, deri tani lufta në Ukrainë ka shkaktuar rreth 194 viktima, mes të cilëve 57 janë civilë. Këto shifra janë bërë publike nga Ministria e Forcave të Armatosura të Mbretërisë së Bashkuar.

James Heappey, u ka thënë deputetëve në Dhomën e Komunave se 450 ushtarë rusë dhe 194 ukrainas, përfshirë 57 civilë, janë vrarë që nga fillimi i pushtimit të Vladimir Putinit dje.

Po ashtu ai tha se numri i vdekjeve civile është më i lartë sesa raportoi OKB, e cila tha se kane humbur jetën 25 persona.

Heappey tha gjithashtu se trupa të tjera të Mbretërisë së Bashkuar po dërgoheshin në Estoni, aleatin e NATO-s, më herët se sa ishte planifikuar dhe gjithsej 1,000 trupa janë në gatishmëri për të ndihmuar vendet fqinje të Ukrainës të trajtojnë refugjatët që ikin nga vendi.