“Ndaloni këtë çmenduri!”/ Hakerat sulmojnë mediat ruse, mesazhet dhe thirrjet që lanë për Putin

Disa prej faqeve ruse të lajmeve janë goditur ditën e sotme  nga grupi i hakerave Anonymous. Lexuesit që hynë në agjencinë shtetërore ruse të lajmeve Tass për ngjarjet në Ukrainë u tronditën këtë të hënë, teksa lexuan mesazhet që hakerat kishin lënë.

“Të dashur qytetarë. Ju bëjmë thirrje që të ndaloni këtë çmenduri, mos i dërgoni në vdekje të sigurt djemtë dhe burrat tuaj. Putini na bën të gënjejmë dhe na vë në rrezik”, thuhet në faqen e hakuar.

“Për disa vite do të jetojmë si në Korenë e Veriut. Çfarë është për ne? Për ta futur Putinin në tekstet shkollore? Kjo nuk është lufta jonë, le ta ndalojmë!” – ishte thirrja që hakerat kishin lënë.

Nuk është e qartë se kush e ndryshoi faqen, por mesazhi shfaqej me logon e Anonymous.

Thirrja përfundonte me fjalitë: “Ky mesazh do të fshihet dhe disa prej nesh do të pushohen nga puna apo edhe do të burgosen. Por nuk durojmë dot më… Gazetarë indiferentë të Rusisë.”