Dita e 10-të e luftës, kryebashkiaku i Kherson: S’kemi më armë për të rezistuar

Kryetari i bashkisë së Khersonit, Ihor Kolykhaiev në një intervistë tha se nuk kanë më armë për t’i rezistuar forcave ruse.

Ai tha se nuk ka më ushtarë në qytetet dhe se qytetarët nuk kanë më armë për të sulmuar rusët.

“Populli i Khersonit është i paarmatosur. Ne nuk kemi më armë për të rezistuar, për të bërë një rezistencë të armatosur. Ne nuk kemi ushtri në qytet. Ushtria është mundur. Ushtria ukrainase duhej të tërhiqej. Ata janë tërhequr drejt Nikolaevit” tha ai.

Ai bëri edhe një apel për ndihmë humanitare, duke thënë se “prodhimi, infrastruktura kritike është pezulluar. Qyteti është pa energji dhe pa ujë.”

Kjo është dita e 10 e luftës në Ukrainë, ndërsa ushtarët dhe qytetarët po përpiqen që të mbrojnë vendin e tyre, teksa rusët bombardojnë pamëshirshëm shumë qytete.