“Vuçiç akuzoi Ukrainën se fshihet pas…”, Kievi zyrtar: I bëjmë thirrje Beogradit…

Ministria e Punëve të Jashtme të Ukrainës ka hedhur poshtë ditën e sotme deklaratat e presidentit serb Aleksandar Vuçiç, se avionët serbe të cilat udhëtojnë për në Rusi, janë bërë shënjestër e alarmeve të rreme për bomba.
Kujtojmë se kjo është situatë për të cilën është akuzuar drejtëpërdrejtë Ukrainën dhe Bashkimin Europian.
“Ministria e Punëve të Jashtme të Ukrainës hedh poshtë kategorikisht akuzat e pabaza të presidentit të Serbisë, Aleksandar Vuçiç, për pjesëmarrjen e Ukrainës në raportimet e rreme për bomba në fluturimet civile drejt Rusisë, të cilat janë kryer nga linja ajrore serbe”, tha sot zëdhënësi i kësaj ministrie, Oleg Nikolenko.
Mbrëmjen e djeshme në një intervistë për Pink TV, Presidenti i Serbisë Vuçiç tha se raportimetpër bomba në avionët serbë, kanë ardhur nga shërbimet e një vendi nga Bashkimi Evropian dhe Ukraina, raportoi media serbe Danas.
Ai shtoi ndër të tjera se Air Serbia do të vazhdojë të kryejë fluturime drejt Rusisë, pavarësisht kërcënimeve.
Zëdhënësi i Ukrainas Nikolenko, shprehu gjithashtu pakënaqësinë që Serbia ende nuk i është bashkuar sanksioneve të Bashkimit Evropian kundër Rusisë.
“Sanksionet e forta dhe uniteti i botës demokratike mund ta ndalojnë këtë luftë. Ne i bëjmë thirrje Beogradit të ngrihet për të vërtetën dhe të bashkohet në mbështetjen e Ukrainës dhe vlerave mbi të cilat bazohet bashkimi i Evropës demokratike”, tha Nikolenko./Gazeta Shqip