Si po përdoren delfinët nga ushtria ruse në Detin e Zi?

Mund të tingëllojë si skenari i një filmi aksion ama përdorimi i kafshëve për qëllime ushtarake ka një histori të gjatë dhe është shumë më i zakonshëm seç mund të mendohet.

Në fakt është e vërtetë, sipas imazheve satelitore, ushtria ruse duket se po përdor delfinë të trajnuar për të mbrojtur bazën e saj detare në Detin e Zi.

Imazhet e publikuara nga kompanie amerikane satelitore Maxar kanë kapur dy struktura të ndërtuara në portin Sevastopol në kepin jugor të Krimesë.

Rusia thuhet të ketë nisur trajnimin e kafshëve detare për qëllime ushtarake që në vitet 60-të.

Gjatë Luftës së Ftohtë, edhe SHBA dhe Bashkimi Sovjetik kanë zhvilluar programe ushtarake për delfinët dhe luanët e detit.

Delfinët mund të komunikojnë me njëri tjetrin me anë të tingujve apo disa fishkëllimave me frekuenca të larta.

Në të njëjtën kohë ato mund të ndjejnë prezencën e objekteve dhe të përcaktojnë distancën prej tyre me anë të një aftësie të njohur si eko-lokacion.

Kjo aftësi i lejon delfinët të dërgojnë valë zanore me frekuenca të larta të cilat përplasen me objektet dhe kthehen rikoshet duke zbuluar vendndodhjen dhe largësinë e tyre nga delfinët.

Delfinë të trajnuar e përdorin këtë shqisë natyrore për të dalluar prezencën e objekteve të ndryshme që mund të jenë kërcënime të mundshme, si minat nën-ujore apo zhytësit e palës armike.

“Specialistët tanë kanë ndërtuar pajisje të reja të cilat konvertojnë këtë frekuencë të dërguar nga delfinët në një sinjal i cili dërgohet drejt e tek operatorët tanë monitorues,” – raportoi agjencia ruse mediatike RIA Novosti.

SHBA i ka përdorur gjithashtu prej vitesh delfinët për të kryer detyra të cilat njerëzit e kanë të pamundur t’i bëjnë, duke nisur nga zbulimi i minave nën-ujore, tek gjetja e objekteve të humbura apo edhe grumbullimi i inteligjencës.

Programi i flotës ushtarake amerikane thuhet se ka shpenzuar mbi $75 milionë dollarë për trajnimin e delfinëve nga viti 2012-2019, sipas Hakai Magazine.

Aftësitë e delfinëve u përdorën nga amerikanët edhe gjatë Luftës së Irakut në vitin 2003.

Dy prej tyre me emrat Makai dhe Tacoma, u stërvitën për të pastruar shtegun që duhet të ndiqej nga anijet humanitare.

Ata identifikuan prezencën e minave dhe vendosën shënjues lehtësisht të identifikueshëm nga anijet që do të kalonin mbi këto ujëra të rrezikshëm.

Sidoqoftë, organizata për mbrojtjen e të drejtave të kafshëve si PETA kanë bërë thirrje kundër këtyre praktikave duke i quajtur ato abuzive.

Në një prej deklaratave të tyre ata thanë se, “Lufta është një sipërmarrje njerëzore dhe ndërkohë që njerëzit dhe partitë politike mund të vendosni nëse ajo është e nevojshme, kafshët nuk mund ta bëjnë dot këtë.”

Back to top button
LAJMET E FUNDIT