“Nuk heq dorë”, ish-kancelari gjerman refuzon të ndërpresë lidhjet me Putinin

Ish-kancelari gjerman, Gerhard Schroeder refuzon të ndërprerë kontaktet me presidentin rus, Vladimir Putin, pavarësisht presionit që të ndërpresë miqësinë me të.
“Unë nuk do të heq dorë nga mundësitë e mia për bisedime me presidentin Putin”, tha Schroeder për gazetën gjermane, Frankfurter Allgemeine Zeitung.
Sa i përket luftës në Ukrainë, Schroeder theksoi se nuk beson në zgjidhjen ushtarake të kofliktit në Ukrainë.
“Se si duket një zgjidhje e tillë, mund të sqarohet vetëm me negociata”, tha Schroeder.
Schroeder, socialdemokrat, ka qenë kancelar i Gjermanisë nga viti 1998 deri më 2005 dhe, pas largimit nga detyra, është bërë kryetar i bordit të kompanisë shtetërore ruse të naftës, Rosneft.
Schroeder është përballur me kritika të ashpra në Gjermani, për vite me radhë, për shkak të punës së tij për kompanitë ruse.