Kosova në krizë për energji, ministrja: I dhamë Shqipërisë 127 mijë MWh, po i marrim më pak se 1 mijë për t’i evituar reduktimet

Kosova u fut zyrtarisht në krizë energjitike ditën e djeshme. Në mëngjes, Kosova lajmëroi kufizimet e energjisë elektrike për të gjithë konsumtorët.

Në mediat e Kosovës u bënë publike urdhëresat nga Qendra Nacionale Dispecerike e Kosovës, pjesë e KOSTT-it, që të fillojë me kufizimet e energjisë elektrike nga ora 8:00 e ditës së sotme.

Por, këto masa u anuluan.

Mediat e Kosovës shkruajtën më vonë se Kosova ka eliminuar përkohësisht reduktimet e furnizimit me energji elektrike falë ndihmës së Shqipërisë

Ministrja e Ekonomisë, Artane Rizvanolli, ka treguar bilancin e shkëmbimit energjetik mes Kosovës dhe Shqipërisë.

Rizvanolli ka thënë se KEK i ka dhënë KESH-it 121.7 MWh, ndërsa sot ka marrë 1 mijë MWh për evitimin e reduktimeve.

“KEK deri sot i ka dhënë KESH-it 121.7 mijë MWh. Sot po marrim më pak se 1 mijë MWh për të evituar reduktimet. Këto janë rezultatet e prekshme për qytetarët kur ne bashkëpunojmë!”, shkruan Rizvanolli.

Edhe vitin e kaluar, Kosova është prekur nga kriza energjetike, prandaj konsumatorët janë përballur me reduktime dhe shtrenjtim të tarifave. Dy termocentralet në Obiliq, Kosova A dhe B mund të prodhojnë energji deri në 800 megavat në orë, kurse nevojat e konsumatorëve, gjatë dimrit, arrijnë deri në 1.300 megavat në orë.

Në Kosovë, rreth 94 për qind e energjisë prodhohet nga djegia e thëngjillit, ndërsa rreth 6 nga burimet e ripërtërishme sikurse hidrocentralet, centralet me erë dhe panelet diellore.

Back to top button
LAJMET E FUNDIT