Tensionet në rritje Kinë-Tajvan, SHBA njofton shitjen e 1.1 miliardë dollarë armë për ishullin

Administrata Biden ka njoftuar një shitje 1.1 miliardë dollarësh armësh për Tajvanin, ndërsa tensionet SHBA-Kinë përshkallëzohen për statusin e ishullit. Edhe vetë Tajvani muajt e fundit ka parë një përshkallëzim të tensioneve me Kinën, që pas nisjes së luftës në Ukrainë.

Shitja përfshinte 355 milionë dollarë për raketat ajër-det Harpoon dhe 85 milionë dollarë për raketat ajër-ajër Sidewinder, tha Departamenti i Shtetit.

Pjesa më e madhe e shitjes është një paketë mbështetëse logjistike prej 655 milionë dollarësh për programin e radarëve të mbikqyrjes së Tajvanit, i cili ofron paralajmërime për mbrojtjen ajrore. Sistemet e paralajmërimit të hershëm të mbrojtjes ajrore janë bërë më të rëndësishme pasi Kina ka rritur stërvitjet ushtarake pranë Tajvanit, të cilin e konsideron si një provincë renegate.

Departamenti i Shtetit tha se pajisjet ishin të nevojshme për Tajvanin për të “ruajtur një aftësi të mjaftueshme vetëmbrojtjeje”. Administrata njoftoi Kongresin për shitjen pas mbylljes së marrëveshjes të premten.

Administrata Biden tha se marrëveshjet ishin në përputhje me politikën e SHBA-së për Kinën. Presidenti Biden i kërkoi Pekinit “të ndërpresë presionin e tij ushtarak, diplomatik dhe ekonomik kundër Tajvanit dhe në vend të kësaj të angazhohet në dialog kuptimplotë me Tajvanin”.

Liu Pengyu, zëdhënës i ambasadës kineze në Uashington, tha se shitja e armëve “rrezikon rëndë marrëdhëniet Kinë-SHBA dhe paqen dhe stabilitetin në ngushticën e Tajvanit. Kina do të marrë me vendosmëri kundërmasat legjitime dhe të nevojshme në dritën e zhvillimit të situatës”.

Laura Rosenberger, drejtoresha e lartë e Shtëpisë së Bardhë për Kinën dhe Tajvanin, tha vonë të premten se ndërsa Kina “vazhdon të rrisë presionin mbi Tajvanin – duke përfshirë praninë e shtuar ushtarake ajrore dhe detare rreth Tajvanit – dhe angazhohet në përpjekje për të ndryshuar status quo-në në Ngushtica e Tajvanit, ne po i ofrojmë Tajvanit atë që i nevojitet për të ruajtur aftësitë e tij vetëmbrojtëse”.

Back to top button
LAJMET E FUNDIT