Loja e Rusisë: E ka përdorur zyrtarisht Kosovën për herë të parë si justifikim për marrjen e territoreve të Ukrainës

Derisa Serbia e ka parë Rusinë si armën më të fortë të saj kundër Kosovës në arenën ndërkombëtare, rusët kanë përdorur pikërisht Kosovën dhe vendimin e Gjykatës Ndërkombëtare të Drejtësisë si provë se referendumet në rajonin e Ukrainës për anëtarësim në Federatën Ruse janë në përputhje me të drejtën ndërkombëtare.
Vladimir Putin e përdorte edhe më parë shembullin e Kosovës në fjalimin e tij, por tani më në reagimin zyrtar të Ministrisë së Jashtme të Rusisë për referendumet në rajonet e Donetsk-ut, Luhansk-ut, Kherson-it dhe Zaporozhye-s, Kosova është marrë shembull për të arsyetuar legjitimitetin e tyre.
“Referendumet janë bërë në pajtueshmëri të plotë me principet e Ligjit Ndërkombëtar. Populli në këto rajone ka ushtruar të drejtën e vetë për vetëvendosje në pajtim me Kartën e OKB-së, konventën për të drejtat të njeriut të vitit 1966, me Aktin Final të Helsinkit të vitit 1975, dhe me verdiktin e Gjykatës Ndërkombëtare të Drejtësisë për Kosovën të vitit 2010. Ky vendim konfirmoi se deklarimi i njëanshëm i pavarësisë nga një pjesë nuk shkel asnjë normë të Ligjit Ndërkombëtar”.
Argumenti kryesor i Serbisë gjithmonë ka qenë se shpallja e Kosovës shtet ishte në kundërshtim me të drejtën ndërkombëtare dhe kurs të njëjtë mbanin pas vendimit të GJND-së, përkundër se vetë kishin kërkuar një vendim nga kjo gjykatë.
Në këtë përpjekje të tyre mbështetësi kryesor ishte Rusia si një partner i fuqishëm dhe me mundësi vetoje për pranimin e Kosovës në OKB. Tani, lëvizja e fundit e Putin-it ka shqetësuar qeverinë në Serbi, meqë partneri i tyre kryesor rrëzon argumentin që mbronin dikur.
Situata e Kosovës me rajonet e që Rusia ka obliguar referendume të dhunshme nuk ngjason fare, por Putin po e shfrytëzon si valutë kundër Perëndimit.
Rusia kishte filluar ta përmend rastin e Kosovës si arsyetim që nga viti 2014 kur pushtoi dhunshëm Krimenë, por muajve të fundit, Putin e theksonte vazhdimisht.
Gjithsesi, kjo përbën herën e parë që Rusia zyrtarisht lëshon një komunikatë që e arsyeton referendumin në zonat e Ukrainës me shembullin e Kosovës.
/Albanianpost.com