Ish-Presidentët e rajonit thirrje BE: Hapni negociatat për Shqipërinë
Ish-Presidentët dhe Kryeministrat e rajonit kanë kërkuar nga Europa që të hapë negociatat për anëtarësim në BE, për Shqipërinë dhe Maqedoninë e Veriut.
Qeveritarët që janë shprehur për këtë çështje janë Stevo Pendarovski, Presidenti i Maqedonisë Veriore, ish-presidenti i Kroacisë Stipe Mesic, ish-presidenti i Kosovës Fatmir Sejdiu, ish -presidenti i Shqipërisë Alfred Mojsiu, ish- presidenti i Maqedonisë Branko Crvenkovski dhe ish- udhëheqës të tjerë të rajonit. Mungon deklarata e Berishës dhe Ivanovit.
Stevo Pendarovski, deklaroi se pret nga Bashkimi Evropian lidership dhe vendosmëri në përcaktimin e datës për bisedimet e anëtarësimit me vendin e tij.
“Është një kombinim fitues për të gjithë palët e interesuara”, tha Pendarovski, duke shtuar se Bashkimi Evropian duhet të mbetet konsistent kur vjen puna tek pritjet e larta që ka krijuar te qytetarët.
“Nëse Maqedonia Veriore dhe Shqipëria nuk marrin një datë për bisedimet e anëtarësimit dhe Bosnja dhe Hercegovina nuk merr një mendim pozitiv për kërkesën për anëtarësim, në vend të përparimit thelbësor në rajon, do të përballemi sërish me zhgënjimin”, u shpreh Pendarovski.
Këto deklarata , presidenti i ri maqedonas i bëri në një konferencë rajonale në Shkup, ku morën pjesë ish-udhëheqës të të gjitha vendeve të rajonit. Unanime ishin mesazhet se vendi së bashku me Shqipërinë meriton një datë për fillimin e negociatave.
Në një deklaratë të ish- presidentëve të rajonit ku kanë marrë pjesë ish–presidenti i Kroacisë Stipe Mesic, ish-presidenti i Kosovës Fatmir Sejdiu, ish- presidenti i Shqipërisë Alfred Mojsiu, ish-presidenti i Maqedonisë Branko Crvenkovski dhe ish- udhëheqës tjerë të rajonit është miratuar edhe një deklaratë ku theksohet se “ ne anëtarët e Klubit të Podgoricës shprehim gatishmërinë tonë që të bëjmë gjithçka që të parandalojmë që Ballkani Perëndimor përsëri të jetë viktimë e ideve dhe trendëve retrograde”
“Shtyrja e mëtejshme e këtyre vendimeve në kontekstin e tashmë gjeopolitik dhe gjeoekonomik mund të ketë ndikim të dëmshëm edhe në nivel të brendshëm edhe në atë rajonal. Jemi dëshmitarë të sfidave të rendit global që bazohet në vlerat e përbashkëta dhe demokratike të shoqërive dhe mundësinë që ato të kenë ndikim negativ në Ballkanin Perëndimor”, thuhet në deklaratën e ish-Presidentëve dhe Kryeministrave.
Pjesëmarrësit në konferencë miratuan një deklaratë të përbashkët duke i bërë thirrje Bashkimit Evropian t’i mbështesë përpjekjet e vendeve aspiruese nga Ballkani Perëndimor. Dokumenti pritet të dërgohet tek institucionet më të larta të BE-së.