Inteligjenca ukrainase: Luftimet janë bllokuar, s’ka përparime as nga ne e as nga Rusia! Presim armë nga perëndimi

Luftimet në Ukrainë janë aktualisht “në një bllokim” pasi as Ukraina dhe as Rusia nuk mund të bëjnë përparime të rëndësishme, tha kreu i agjencisë së inteligjencës ushtarake ukrainase, ndërsa Kievi pret për armë më të avancuara nga aleatët perëndimorë.

“Situata thjesht është bllokuar,” tha Kyrylo Budanov për BBC. Pasi trupat ukrainase rimorën qytetin jugor të Khersonit në nëntor, shumica e betejave më të ashpra kanë qenë rreth Bakhmutit, në rajonin lindor të Donetskut.

Diku tjetër, forcat ruse duket se janë në mbrojtje, ndërsa dimri ka ngadalësuar ritmin e operacioneve tokësore të Ukrainës përgjatë vijës së frontit prej 1.000 km (620 milje).

Budanov është shprehur se Rusia “tashmë ishte plotësisht në një qorrsokak” duke pësuar humbje shumë të rëndësishme dhe ai besonte se Kremlini kishte vendosur të shpallte një mobilizim tjetër të rekrutëve. Por, shtoi ai, forcave ukrainase ende u mungojnë burimet për të ecur përpara në fusha të shumta.

“Ne nuk mund t’i mposhtim ata në të gjitha drejtimet në mënyrë gjithëpërfshirëse. As ata nuk munden,” tha ai. “Ne po presim me padurim furnizimet e reja të armëve dhe ardhjen e armëve më të avancuara.”

Në fillim të këtij muaji, pas një sërë pengesash ushtarake ruse, zyrtarët ukrainas paralajmëruan për mundësinë e një sulmi tjetër tokësor nga forcat e Moskës nga Bjellorusia në fillim të vitit 2023. Shtytja, thanë ata, mund të përfshijë një përpjekje të dytë për të kapur kryeqytetin, Kiev , dhe përfshin dhjetëra mijëra rezervistë që trajnohen në Rusi.