Rama: Nga amnistia fiskale nuk heqim dorë, mbyllëm konsultimet për kanabisin mjekësor, do e kalojmë në Kuvend

Kryeministri Edi Rama, në konferencën e përbashkët për shtyp me dy zyrtarët e lartë të BE-së, Oliver Varhelyi dhe Josep Borrell foli për dy nisma të diskutueshme të qeverisë socialiste, atë të amnistisë fiskale dhe legalizimn e kanabisit mjekësor.
Ndryshe nga nisma e “pasaportave të arta”, ku Borrell tha se Rama i kishte premtuar që “nuk do e ndjekë më si çështje”, duket se kreu i qeverisë nuk është tërhequr nga dy nismat e tjera.
Rama tha se qëndrimi i tij për amnistinë fiskale është i ditur, do të bëhet me ekspertizën e Bashkimit Europian. Sa i përket legalizimit të kanabisit mjekësor, Rama tha se ligji është gati për të shkuar në parlament.
“Kemi folur për amnistinë fiskale që është një tjetër temë, qëndrimi im është i ditur, duam të vazhdojmë punën me ekspertët, ne nuk heqim dorë thjesht se kjo nuk është një gjë e mirë në parim. Por ne duam që këtë gjë ta bëjmë së bashku. Ndaj ju falenderojmë shumë për ekspertizën, për kanabisin mjekësor, do të vazhdojmë në parlament.
Në mbyllje të kësaj hyrje dua t’ju falenderoj shumë. Më vjen mirë që komisioneri këtë radhë ka ardhur me fondin për ndërtimin e kolegjit europian në Tiranë”, deklaroi Rama gjatë konferencës së përbashkët me Borrell dhe Varhelyi në përfundim të takimit.