“Këto janë dokumentet”, publikohet audio e Donald Trump për informacionet sekrete
CNN ka bërë publik regjistrimin audio të ish-presidentit amerikan Donald Trump, i cili diskuton mbajtjen e dokumenteve sekrete që ai nuk i ka deklasifikuar. Takimi u mbajt në vitin 2021 në Bedminister me ish-shefat e shtabit të tij.
Regjistrimi, i cili u transmetua për herë të parë në “Anderson Cooper 360” të CNN, përfshin detaje të reja nga biseda që është një pjesë kryesore e provave në aktakuzën e prokurorit special Jack Smith ndaj Trump, për keqpërdorimin e informacioneve të klasifikuara, duke përfshirë një moment kur Trump dëgjohet duke rrëfyer se ai mbante një dokument sekret të Pentagonit me plane për të sulmuar Iranin.
“Këto janë dokumentet,” thotë Trump në regjistrimin audio të siguruar nga CNN.
Në regjistrimin audio prej dy minutash, Trump dhe ndihmësit e tij gjithashtu bëjnë shaka me emailet e kundërshtares së tij për presidencën në atë kohë, Hillary Clinton, pasi ish-presidenti thotë se dokumenti ishte “informacion sekret”.
Deklaratat e Trump në regjistrimin audio, duke thënë se “këto janë dokumentet” dhe duke iu referuar diçkaje që ai e quan “shumë konfidenciale” dhe duket se po u tregon të tjerëve në dhomë, mund të hedhin poshtë pretendimet e ish-presidentit në një intervistë javën e kaluar në Fox News, ku ai tha se nuk kishte asnjë dokument me vete.
“Nuk kishte asnjë dokument. Kjo ishte një sasi e madhe letrash dhe gjithçka tjetër që fliste për Iranin dhe gjëra të tjera. Dhe mund të jetë mbajtur ose jo, por ky nuk ishte një dokument. Unë nuk kisha një dokument, në vetvete. Nuk kishte asgjë për të deklasifikuar. Këto ishin histori gazetash, tregime reviste dhe artikuj”, tha ish-presidenti i SHBA.
Trump u deklarua i pafajshëm në fillim të këtij muaji për 37 akuza në lidhje me keqpërdorimin e supozuar të dokumenteve të klasifikuara të mbajtura në resortin e tij në Florida. Tani mbetet për t’u parë nëse kjo audio e publikuar do të rezultojë si provë kritike nga prokuroria në vazhdimësinë e gjyqit të Donald Trump. Seanca e dytë e dëgjimit do të mbahet në mars të vitit 2024.