Kurti refuzon ftesën e Ramës? Nuk merr pjesë në samitin e Diasporës, zëdhënësi: Kishte angazhime të tjera….

Në Tiranë u zhvillua paraditen e kësaj të enjte Samiti i tretë për Diasporën.

Me ftesë të kryeministrit shqiptar, Edi Rama, mes pjesëmarrësve është edhe presidentja e Kosovës Vjosa Osmani, por jo kryeministri Albin Kurti.

I pyetur nga mediat zëdhënësi i Qeverisë së Kosovës, Përparim Kryeziu, tha se Kurti nuk mund të merrte pjesë në këtë samit për shkak të angazhimeve në agjendë.

“Në Samitin e Diasporës i cili po organizohet në Tiranë, nga Qeveria e Republikës së Kosovës, po marrin pjesë ministrja e Arsimit, Shkencës, Teknologjisë dhe Inovacionit, Arbërie Nagavci, dhe zëvendësministrja e Punëve të Jashtme dhe Diasporës, Liza Gashi.

Gjithashtu, pjesëmarrëse është dhe Presidentja e vendit, Vjosa Osmani. Për shkak të angazhimeve në agjendë, përfshirë seancën e sotme të Kuvendit të Kosovës ku me kërkesë të opozitës do të raportojë mbi Raportin e Progresit të Komisionit Evropian, Kryeministri Kurti nuk ka mundur të marrë pjesë në këtë organizim”, tha Kryeziu.