Ligji për Komisionet/ Reagon Rama: Ka perënduar koha kur Presidenti përdorte Kushtetutën si molotov

Kryeministri Edi Rama ka reaguar pas dekretimit nga Presidenti i vendit të ligjit për Komisionet Hetimore Parlamentare, duke iu përgjigjur akuzave të opozitës.

Në një reagim në platformën X, Rama shprehet se ka perënduar koha politike kur Presidenti i Republikës bashkëudhëhiqte revolucionet imagjinare kundër qeverisë. Sipas tij, Shqipëria s’ka asnjë sekondë për të humbur me askënd që “vazhdon me orën e vjetër, duke kërkuar nëpër rrugicat e ngushta të Kuvendit a të zonës rreth tij,  rikthimin e kohës së vdekur”.

“Koha politike kur Presidenti i Republikës bashkëudhëhiqte revolucionet imagjinare kundër qeverisë e në dëm të Shqipërisë, duke e përdorur Kushtetutën si koktej Molotov ka perënduar me kohë, siç do të mbaroje po njësoj, më shpejt se sa vonë, edhe ora e keqkuptimit të madh të politikës së ditës, mes punës mendore të parlamentarëve dhe aktivitetit fizik të tyre në sallën e Kuvendit të Shqipërisë! Shqipëria është në një kohë tjetër dhe ky vit është kyç për rritjen e mëtejshme të pagave, investimeve publike e atyre private, të brendshme a të huaja, turizmit që në 2023 arriti rekordin fantastik të 10 milionë vizitorëve nga jashtë, e me radhë, prandaj ky vend s’ka asnjë sekondë për të humbur me askënd që vazhdon me orën e vjetër, duke kërkuar nëpër rrugicat e ngushta të Kuvendit a të zonës rreth tij, rikthimin e kohës së vdekur“, shkruan Rama.

Presidenti Bajram Begaj ka dekretuar ditën e sotme ligjin për komisionet hetimore. Dekreti, i cili mban datën 18 janar 2024, u shoqërua edhe me një dokument me argumente, ku Bajram Begaj ia bën të qartë opozitës se kthimi i ligjeve nuk është instrumenti për gjetjen e dialogut politik.

“Pretendimi se ky ligj duhet të ishte miratuar me konsensus nuk ka lidhje me ndonjë kërkesë të Kushtetutës, ndaj Presidenti i Republikës nuk mund ta kthejë atë për shqyrtim me shkakun se i mungon konsensus“, theksoi presidenti.