“Rusia mund të sulmojë NATO-n pas dy vitesh”

Një raport i inteligjencës gjermane tregon synimet e mundshme ushtarake të Rusisë ndaj NATO-s në vitet e ardhshme, duke filluar nga viti 2026. Në raport thuhet se Rusia po përgatitet për një konflikt në shkallë të gjerë me Perëndimin, i treguar nga riorganizimi i ushtrisë së saj, lëvizja e trupave dhe vendosja e raketave në pjesën perëndimore të vendit.

Sipas informacioneve të Business Insider, analiza e shërbimeve të inteligjencës gjermane po qarkullon aktualisht në qeverinë gjermane. Sipas kësaj, vërehet një intensifikimi i ndjeshëm i prodhimit të armëve ruse, i cili mund të çojë në dyfishimin e fuqisë ushtarake të Rusisë në pesë vitet e ardhshme krahasuar me sot, veçanërisht në armët konvencionale.

Ky projeksion ka çuar në përfundimin se një sulm në të paktën një pjesë të territorit të NATO-s, si vendet baltike apo Finlanda, nuk mund të “përjashtohet më” duke filluar nga viti 2026.

Raporti, i cili ende nuk është bërë publik nga shërbimet gjermane, ka tërhequr vëmendjen edhe të selisë së NATO-s. Ndërsa ka shqetësime për aftësitë ushtarake në rritje të Rusisë, zyrtarët e NATO-s besojnë se kjo nuk duhet të çojë domosdoshmërisht në luftë. Vlerësimi i inteligjencës amerikane i cituar nga Business Insider sugjeron se Rusisë mund t’i duhen pesë deri në tetë vjet për të rivendosur forcën ushtarake që kishte përpara pushtimit të Ukrainës.