Pension jo më pak se 300 euro/ “Rithemelimi” depoziton në Kuvend projektligjin: Qeveria i ka mundësitë
Me firmën e Gazment Bardhit, Rithemelimi ka depozituar në Kuvend projektligjin për rritjen e pensioneve.
Sipas deputetëve, duhet që të ketë një trajtim dinjitoz për pensionistët, teksa shtojnë se qeveria i ka mundësitë për këtë financim. Ata kërkojnë që pensioni të bëhet 300 euro deri në vitin 2029.
Ndër të tjera, “Rithemelimi” argumenton se qeveria i ka mundësitë financiare për të përballuar këtë kosto financiare, nëse fondet e saj nuk do t’i alokojë për mobilime zyrash, blerja makinash, karburant dhe tendera e koncesione.
Njoftimi i “Rithemelimit”:
Grupi Parlamentar i Partise Demokratike ka ndërmarre një nisme ligjore që synon rritjen e pensioneve minimale, veçanërisht pensionistëve në zonat rurale, duke vendosur një standard minimal të masës së përfitimit, pavarësisht llojit të pensionit, si dhe duke zhbëre ato parashikime ligjore që e kufizojnë të drejtën e përfitimit të pensionit me tërheqjen ose jo të tij gjatë tre viteve të fundit.
Trajtimi dinjitoz i një prej shtresave më vulnerabël të vendit është një tregues i një shoqërie të emancipuar, në paqe sociale dhe ku vlerësohet drejt puna dhe sakrificat shumëvjecare të bashkëqytetarëve tanë.
Konkretisht, ndërhyrja në ligj synon që të vendosë një standard minimal për masën e përfitimit të pensionit në vendin tonë, pavarësisht llojit të këtij pensioni, duke filluar nga viti 2024 në masën e pensionit mesatar rreth 18 mijë lekë dhe duke vijuar në progresion rritës për 5 vitet e ardhshme, me qëllim që në vitin 2029 të mos ketë pensione më të ulëta se 32 mijë leke (rreth 300 euro).
Kjo masë përfitimi është pothuajse e barabartë dhe në disa raste më e ulët se përfitimet që kanë pensionistët në vendet e rajonit, si Kosova (309 euro), Mali i Zi (425 euro), Maqedonia e Veriut (320 euro) dhe Serbia (390 euro).
Qeveria shqiptare i ka mundësitë financiare për të përballuar këtë kosto financiare, nëse fondet e saj nuk do t’i alokojë për mobilime zyrash, blerja makinash, karburant (konkretisht ulja me 25% e shpenzimeve operative të qeverisjes qendrore), si dhe tendera e koncesione që pasurojnë oligarkët, por që mbështesin shtresën e pensionistëve për t’u ushqyer më mirë, për t’u kujdesur për shëndetin dhe për të përballuar kostot e jetesës.