“Më pickoi një kandil”/ Përshkoi me not kanalin e Otrantos, Eva Buzo tregon sfidat gjatë notimit

Eva Buzo, avokatja shqiptaro-australiane, ka bërë një arritje të jashtëzakonshme në botën e notit të gjatë duke kaluar me sukses kanalin e Otrantos. Pas një përpjekjeje mbresëlënëse, Eva ka përshkuar 92 km nga brigjet e Leçes në Itali deri në Karaburun në Shqipëri, duke përfunduar rrugëtimin në një kohë prej 35 orësh e 17 minutash.

Në një intervistë për News 24, Eva ndau emocionet dhe sfidat e këtij udhëtimi të jashtëzakonshëm. Ajo e përshkroi përpjekjen e saj si një sfidë të madhe, por gjithashtu si një përvojë mahnitëse dhe emocionuese. “Ishte shumë sfiduese, por mahnitëse dhe emocionuese. Pasi ia dola, erdha të festoj këtu në Vlorë. Gjyshi im është shqiptar dhe kjo aventurë ishte një dhuratë për shqiptarët,” tha Eva.

Eva ka bërë histori si gruaja e parë shqiptare që ka kaluar me not kanalin e Otrantos, duke u radhitur pas avokatit italian Paolo Pinto, i cili e kaloi këtë kanalin më 14 korrik 1979. Ekipi dhe përgatitja e kujdesshme ishin thelbësore për këtë arritje. Eva përmendi se pjesa më e vështirë ishte organizimi dhe siguria gjatë udhëtimit. “Pjesa më e madhe e kohës e kam kaluar duke u përgatitur. Realisht kjo pjesë ishte sfiduese. Isha shumë e lumtur këtë vit, e qetë, kisha ekipin e duhur. Realizova një udhëtim të mrekullueshëm me not,” shtoi ajo.

Gjatë rrugëtimit, Eva u përball me disa sfida të tjera, përfshirë një pickim nga një kandil, por pa ndonjë rrezik nga peshkaqenët. Sidoqoftë, ajo shprehu kënaqësinë dhe mirënjohjen për përvojën dhe mbështetje që kishte marrë. “Mësuam shumë nga eksperiencat e vitit të kaluar, ndaj edhe ky vit rezultoi shumë më i suksesshëm. Kur të gjitha gjërat bëhen bashkë, atëherë mund të nisësh të notosh,” përfundoi Eva.

Në përfundim të intervistës, Eva shprehu dëshirën për të rikthyer në Shqipëri dhe të vazhdojë të notojë atje, duke e cilësuar vendin si një nga më të bukurit për këtë sport. Ky udhëtim jo vetëm që ka thelluar lidhjen e saj me trashëgiminë shqiptare, por gjithashtu e ka vendosur atë në majat e notit ndërkombëtar.