VIDEO/ Momenti kur efektivët e policisë qëllohen me armë në Malësi të Madhe, DETAJE nga ngjarja

Policia e Shtetit ka publikuar pamjet nga aksioni anti-drogë i ndërmarrë ditën e sotme, në Malësi të Madhe, teksa ka dhënë detaje mbi sulmin me armë ndaj efektivëve.

Ngjarja ndodhi në zonën e Bjeshkëve të Parusë, teksa efektivët ishin duke kryer kontrolle për plantacione kanabisi.

Siç shihet edhe nga pamjet, Forca e Posaçme “Shqiponja” dhe forca të tjera të policisë Shkodër kanë ndërhyrë në zonë të armatosur dhe me snajper në krahë, për të lokalizuar autorët, ndërsa në sfond dëgjohen sërish të shtëna arme. Po ashtu, në zonë u dërguan Forcat Kombëtare të Sigurisë Njësia Shkodër dhe grupe speciale të RENEA-s me helikopter.

Njoftimi i policisë:

Rreth orës 10:00, në vendin e quajtur “Bjeshka e Parus”, shtetas ende të paidentifikuar kanë qëlluar në ajër, me armë zjarri, kur kanë parë shërbimet e  Policisë të cilat po kryenin kontroll të territorit në njësinë administrative Shkrel, për parandalimin, evidentimin dhe goditjen e kultivimit të bimëve narkotike.

Menjëherë në ndihmë të Policisë vendore janë nisur forcat operacionale të Drejtorisë Vendore të Policisë Shkodër dhe Forca e Posaçme “Shqiponja”, në drejtimin e Drejtorit të Drejtorisë Vendore të Policisë Shkodër.

Me urdhër të Drejtorit të Përgjithshëm të Policisë së Shtetit, po në ndihmë të Policisë vendore, u dëguan Forcat Kombëtare të Sigurisë Njësia Shkodër dhe grupe speciale të RENEA-s me helikopter.

Forcat operacionale në terren, përkundrejt asgjësimit dhe shkatërrimit të bimëve narkotike, vazhdojnë operacionin për lokalizimin dhe kapjen e autorëve të qëllimit me armë zjarri.

Ndërkohë grupi hetimor, në drejtimin e Prokurorisë, po vijon veprimet për sigurimin e provave me qëllim dokumentimin ligjor të rastit.