I grabitën 200 mijë euro taksisit në ish-Bllok/ Identifikohen autorët, policia: Janë të huaj nga…

Është zbardhur ngjarja e grabitjes në ish-Bllok, ku më 4 tetor një taksist iu grabit një shumë prej rreth 220 mijë eurosh brenda mjetit të tij. Autorët e dyshuar të grabitjes janë katër shtetas gjeorgjianë, të cilët janë shpallur në kërkim nga policia.

Emrat e grabitësve të dyshuar janë: L. K., 30 vjeç, T. N., 36 vjeç, N. K., 30 vjeç, dhe Y. B., 31 vjeç. Gjatë hetimeve, u sekuestrua një motomjet si provë materiale, si dhe një automjet tjetër që dyshohet se është përdorur gjatë kryerjes së grabitjes.

Taksisti, i cili ka pasur rolin e transportuesit të parave, kishte tërhequr shumën në një pikë këmbimi valutor dhe do ta transportonte drejt një banke të nivelit të dytë.

Njoftimi i policisë:

“Finalizohet operacioni policor i koduar “Taxi”, nga Komisariati i Policisë Nr. 2 në bashkëpunim me Sektorin për Hetimin e Krimeve të Rënda.

Zbardhet dhe dokumentohet me prova ligjore vjedhja e një shume parash në një taksi në rrugën “Ibrahim Rugova”, më datë 04.10.2024.

Punohet për kapjen e 4 shtetasve gjeorgjianë, autorë të dyshuar.

Shërbimet e Komisariatit të Policisë Nr. 2 në bashkëpunim me Sektorin për Hetimin e Krimeve të Rënda, në vijim të punës për zbardhjen e ngjarjes së ndodhur më datë 04.10.2024, ku në zonën e ish-Bllokut, disa shtetas kanë vjedhur një shumë parash në një taksi, kanë organizuar punën për zbardhjen dhe dokumentimin e plotë ligjor të ngjarjes e identifikimin e autorëve të dyshuar dhe kanë finalizuar operacionin policor të koduar “Taxi”.

Nga veprimet hetimore të kryera në kuadër të këtij operacioni, ka rezultuar se autorë të dyshuar të kësaj vjedhje janë shtetasit L. K., 30 vjeç, T. N., 36 vjeç, N. K., 30 vjeç, dhe Y. B., 31 vjeç, me shtetësi gjeorgjiane, për të cilët po punohet për kapjen dhe arrestimin e tyre.

Në cilësinë e provës materiale u sekuestrua një motomjet, si dhe është shpallur në kërkim një automjet që dyshohet se është përdorur gjatë kryerjes së kësaj ngjarje.

Materialet i kaluan Prokurorisë”, njofton policia.