Seanca në Apelin e GJKKO, Veliaj: Saliu e akuzoi SPAK si organizatë kriminale, pse nuk u konsideruan prova të reja

Zbardhen detaje nga seanca në Apelin e GJKKO ku zhvillohet seanca për kryetarin e bashkisë së Tiranës, Erion Veliaj i cili kërkon lirimin nga qelia.
Në nisje të seancës, avokati i Veliajt, Artur Selmani, ka paraqitur qëndrimin e tij mbi provat e reja që ka paraqitur SPAK, arsye për të cilën u shty edhe seanca maratonë e një dite më parë. Të pranishëm në seancë janë edhe dy prokurorët e Posaçëm, Ols Dado dhe Altin Dumani.
Ndërkohë, Shqiptarja.com ka zbardhur edhe një pjesë të fjalës së Veliajt, i cili sipas burimeve, bëhet me dije se ka kërkuar që seanca të bëhet e hapur për mediat, duke thënë se kërkon që të deklaroj mbi përgjimet që janë kryer ndaj tij brenda në qeli.
Veliaj ka kundërshtuar pretendimet e prokurorëve, ndërsa burimet thonë se ka deklaruar para trupës gjykuese se nuk ka asnjë sekret në bisedat e telefonike me familjarët e mi nga kabina burgut.
Veliaj thotë se është mbajtur për një muaj në izolim që të gjendet provat e reja, ndërsa sjell në vëmendje edhe deklaratat e Sali Berishës i cili ka kërcënuar hapur SPAK e prokurorët, duke i quajtur organizatë kriminale.
“Por çfarë i ndodhi Saliut?”, ka pyetur Veliaj në sallë, duke thënë se sulmet e Berishës nuk u konsideruan prova të reja.
“Keni sjell “prova të reja”, kërkoj të sillni kamerat dhe kjo seancë të jetë e hapur për median. Silllni mediat që t’i deklaroj publikisht edhe para tyre përgjimet e kryera ndaj meje. Nuk kam asnjë sekret në bisedat e telefonike me familjarët e mi nga kabina burgut.
Më izoluat 1 muaj në burg që të gjenit “prova të reja. Saliu e ofendoi SPAK dhe e akuzoi si organizatë kriminale, çfarë e gjeti? Pse nuk u konsideruan prova të reja sulmet e Berishës ndaj SPAK?”, ka thënë Veliaj.
Seanca një ditë më parë u shty pasi mbrojtja e Veliajt kërkoi kohë të njihej me provat e reja që dorëzuan dy prokurorët e posaçëm Ols Dado dhe Altin Dumani.
Dy avokatët Ermir Beta dhe Artur Selmani kanë kërkuar masë më të butë sigurie për Veliajn kundrejt garancisë pasurore, me argumentin se nuk ka rrezik që të prishë provat. Ndërkohë, edhe sot Veliaj do të jetë i pranishëm në seancë, ku pritet edhe të flasë para gjyqtarit Engert Pëllumbi. Do jetë ky i fundit që do të vendosë nëse Veliaj do të lirohet ose jo nga qelia, ndërsa njihet edhe si gjyqtari që dënoi ish-ministrin socialist Saimir Tahiri.
Pranë Apelit të GJKO ishte edhe Joshua Roberts, përfaqësues i studios ligjore amerikane “Kasowitz Benson Torres LLP”, e cila po këshillon kryebashkiakun Veliaj.
Kryebashkiaku Veliaj mbahet në qeli që prej 10 shkurtit dhe akuzohet për veprat penale “Korrupsion pasiv” dhe “Pastrim parash”, të kryer në bashkëpunim me bashkëshorten e tij Ajola Xoxa, e cila po hetohet në masë detyrim paraqitje, edhe për mosdeklarim pasurie.