Duhet të përgatitemi tani për SKENAR LUFTE! Paralajmëron Britania: Strategjia kërkon përgatitje të menjëhershme

Për herë të parë pas dekadash, qeveria britanike paralajmëron se vendi duhet të përgatitet seriozisht për një skenar lufte brenda territorit të saj. Kjo është theksuar në një raport të fundit të sigurisë kombëtare, ku thuhet se kërcënimi për një sulm shtetëror ndaj Mbretërisë së Bashkuar është në rritje dhe më real se kurrë.

Sipas raportit, kundërshtarët e Britanisë po ndërmarrin hapa të fshehtë për të krijuar kaos në zinxhirët e furnizimit dhe sektorin e energjisë, për të paralizuar reagimin britanik ndaj çdo agresioni. Infrastruktura nënujore kabllot e komunikimit dhe tubacionet e gazit janë shënjestra të veçanta, pasi përbëjnë bazën e funksionimit të vendit.

Dokumenti paralajmëron gjithashtu për rreziqe të reja nga armë kimike dhe biologjike, si dhe aktivitete të tjera armiqësore si spiunazhi, sabotimi, vrasjet dhe ndërhyrjet në procese demokratike.

Për t’iu përgjigjur këtyre sfidave, qeveria synon të përforcojë mbrojtjen e brendshme, përfshirë mbikëqyrjen e infrastrukturës kritike dhe ushtrime të përvitshme të gatishmërisë kombëtare. Një rrjet i ri qendrash të biosigurisë do të krijohet me mbi 1 miliard £ investim, për të përballuar situata emergjente biologjike.

Raporti kërkon një ndryshim të thellë kulturor në mënyrën si qeveria britanike e trajton sigurinë kombëtare, duke propozuar masa më të forta në çdo fushë të politikës dhe vendimmarrjes.

Ndërkohë, një auditim i veçantë mbi Kinën vë në dukje fuqizimin e shpejtë ekonomik, ushtarak dhe teknologjik të Pekinit, i cili shihet si burim i shtuar rreziku për Britaninë. Sekretari i Jashtëm David Lammy deklaroi në Parlament se detajet e auditimit nuk do të publikohen për shkak të ndjeshmërisë së informacionit, por ai pranoi se raporti nxjerr në pah mbështetjen e Kinës ndaj Kremlinit dhe përfshirjen e saj në akte si spiunazhi dhe sulmet kibernetike.

Strategjia e re kërkon rritjen e kapaciteteve të sigurisë ndaj Kinës dhe aktorëve të tjerë shtetërorë që mund të dëmtojnë interesat britanike, duke përfshirë më shumë trajnime, njohuri dhe teknologji në sistemin e sigurisë.

Ministri i Kabinetit Pat McFadden tha se strategjia përfaqëson një qasje të vendosur dhe realiste ndaj kërcënimeve të sotme dhe të së ardhmes, dhe se do të fokusohet gjithashtu në investime në inteligjencë artificiale dhe inovacion në mbrojtje.

Me këtë strategji të re, Britania përgatitet për një epokë të re të pasigurisë globale dhe nxit ndërgjegjësimin se kërcënimet ndaj sovranitetit dhe stabilitetit të saj nuk janë më vetëm teori – por rrezik i mundshëm dhe i afërt.