Plazhi i Gjipesë u kthehet pushuesve, Vangjel Tavo: Larguam karriget dhe tavolinat e vendosura pa leje

Kryebashkiaku i Himarës, Vangjel Tavo ka publikuar mëngjesin e sotëm pamje nga një aksion i Policisë Bashkiake për lirimin e plazhit publik në Gjipe. Një subjekt që vepronte si bar-restorant, kishte vendosur karrige e tavolina pa leje.

“Plazhet nuk janë për t’u zaptuar! Në plazhin e Gjipesë, u lirua sërish një hapësirë publike e zënë pa asnjë leje. Një subjekt kishte ngritur tendë dhe pajisur zonën me tavolina e karrige, duke kufizuar hapësirën për qytetarët.

Ky është një tjetër rast i përsëritur i shfrytëzimit të paligjshëm të hapësirave publike. Bashkia Himarë dhe policia bashkiake do të ndërhyjnë në çdo rast ku cenohet ligji dhe interesi i përbashkët”, shkruan kryebashkiaku Vangjel Tavo.

Ai thekson se plazhet janë për të gjithë qytetarët dhe si të tillë, bizneset duhet të respektojnë ligjin dhe komunitetin, duke mos zënë hapësirën publike.