Sali Berisha: Sot do ishim në pushtet. Nuk humbëm, por na vodhi Rama

Partia Demokratike mblodhi sot Këshillin Kombëtar, ku pati për objekt diskutimi disa tematika, që lidheshin kryesisht me analizës zgjedhore të 11 majit, por edhe protesta kombëtare e 22 dhjetorit.

Fjalën hapëse e mbajti Sali Berisha, i cili shpjegoi shkaqet e vonesës së mbajtjes së kësaj mbledhjeje, duke deklaruar se me rëndësi ishte mbrojtja e votës dhe faktimi i farsës elektorale të Edi Ramës dhe mazhorancës.

“Ca të tjerë në mungesë të kulturës elektorale apo shkaqe të tjera, që mendojnë ndryshe, u them prapë, se në rast se qeveria organizon në kundërshtim me ligjin, duke shpenzuar dhe organizon 4533 aktivitete, përfshi ditën e votimit me 7 mln euro Giro D’Italia, ajo nuk zhvillon zgjedhje, por farsë, e shkel parimet themelore ndërkombëtare për zgjedhje të drejta”, tha Berisha, teksa rendiste shkaqet pse zgjedhjet u manipuluan dhe pse PD nuk fitoi dot.

Më tej ai vijoi dhe renditi faktorë të tjerë:

“Nëse qeveria u dhuron 65% të zgjedhësve 100 euro bonus, ato nuk janë zgjedhje, por farsë. Në rast se qeveria fal dy ditë para zgjedhjeve 2 mld euro dhe kamata, ato që unë i quaja 200 mln provohen të jenë 2 mld, ku janë 200 mijë biznese, nga të cilat 84 mijë aktive, ato nuk janë zgjedhje, por farsë. Në rast se qeveria licencon mbjelljen e 28 mijë hektarëve kanabis nga 200 hektarë që parashikon ligji, e kjo para zgjedhjeve, kjo është farsë dhe vetëm kjo mjafton. Nëse qeveria angazhon si agjentë elektoralë administratën shtetërore, logjistikën e saj, mjetet, fuqinë ekzekutive të saj, ato nuk janë zgjedhje, por farsë”.

Lideri i opozitës shprehu bindjen se Rama dhe mazhoranca nuk do i fitonin dot zgjedhjet nëse nuk do përdornin ‘te shtylla” kryesore, që ishin fondet e buxhetit, bandat kriminale dhe administratën elektorale.

“Në rast se ndonjë njeri mendon se Rama fitoi zgjedhjet, është i mashtruar dhe mashtron veten. Nëse përdor bandat më të rrezikshme të Evropës, si Troplinët e Durrësit, Xhabaftët e Vorës, Bajrat e Shkodrës, Çelët e Elbasanit, Bandën e Lushnjës dhe u jep listën atyre, ato nuk janë zgjedhje, por farsë. Edi Rama s’i fitoi kurrë zgjedhjet, PD do ishte në pushtet nëse nuk do përdoreshin 2 mld euro dy ditë para zgjedhjeve dhe bandat për të terrorizuar qytetarët”, tha ai.

Berisha shpjegoi se opozita nuk mund t’i ofronte dot këto, ndaj edhe humbi përballë kundërshtarit që zhvilloi farsën që ai e paralajmëroi më parë.

”Ne jemi opozitë dhe s’mund t’i përdorim dot këto ofrime, nuk i japim dot ato ne. Ndaj e kisha thënë se me Ramën zgjedhje nuk ka”, vijoi kreu i selisë blu.